tufan hai agar ghar ke darpai yun baiTh na jao kuchh to karo

tūfāñ hai agar ghar ke darpai yuuñ baiTh na jaao kuchh to karo

khiḌkī ke shikasta shīshe par kāġhaz hī lagāo kuchh to karo

insān ke qabza-e-qudrat meñ ik nutq nahīñ hai bahut kuchh hai

hoñToñ se na nikle baat agar āñkhoñ se sunāo kuchh to karo

mahrūm-e-tamannā rahne kā sannāTā khā jā.egā tumheñ

māyūsī ke sakte se bacho aañsū hī bahāo kuchh to karo

sultān ke qasr-e-marmar kā darvāza-e-āhan band sahī

gar toḌ nahīñ sakte us ko zanjīr hilāo kuchh to karo

ai jalte hue ghar ke logo sho.aloñ meñ ghire kyā sochte ho

jab aag bujhānā mushkil hai bāhar nikal aao kuchh to karo

ye khet jo chup haiñ boleñge aur akhuve āñkheñ kholeñge

bārish na sahī bijlī hī sahī kuchh to barsāo kuchh to karo

tufan hai agar ghar ke darpai yun baiTh na jao kuchh to karo

khiDki ke shikasta shishe par kaghaz hi lagao kuchh to karo

insan ke qabza-e-qudrat mein ek nutq nahin hai bahut kuchh hai

honTon se na nikle baat agar aankhon se sunao kuchh to karo

mahrum-e-tamanna rahne ka sannaTa kha jaega tumhein

mayusi ke sakte se bacho aansu hi bahao kuchh to karo

sultan ke qasr-e-marmar ka darwaza-e-ahan band sahi

gar toD nahin sakte us ko zanjir hilao kuchh to karo

ai jalte hue ghar ke logo shoalon mein ghire kya sochte ho

jab aag bujhana mushkil hai bahar nikal aao kuchh to karo

ye khet jo chup hain bolenge aur akhuwe aankhen kholenge

barish na sahi bijli hi sahi kuchh to barsao kuchh to karo