tufan se thapeDon ke sahaare nikal aae

tūfāñ se thapeḌoñ ke sahāre nikal aa.e

Duube the burī tarah se baare nikal aa.e

patthar pe paḌī choT sharāre nikal aa.e

be-dard bhī hamdard hamāre nikal aa.e

ab tak koī taskīn kī sūrat nahīñ niklī

din Dhal gayā shaam aa ga.ī taare nikal aa.e

un ko kisī hālat meñ na baḳhshegā kinārā

auroñ ko Dubo kar jo kināre nikal aa.e

dekhe to koī mojaza-e-rabt-e-mohabbat

un āñkhoñ se aaj ashk hamāre nikal aa.e

jo chāho karo aaj se duniyā hai tumhārī

apnā jinheñ samjhā vo tumhāre nikal aa.e

ḳhud mil ga.e us but se mujhe kar ke nasīhat

vaa.iz bhī ḳhudā hī ke sañvāre nikal aa.e

ik aise buzurg aaj 'nazīr' aa ga.e piine

mai-ḳhāne se ham sharm ke maare nikal aa.e

tufan se thapeDon ke sahaare nikal aae

Dube the buri tarah se bare nikal aae

patthar pe paDi choT sharare nikal aae

be-dard bhi hamdard hamare nikal aae

ab tak koi taskin ki surat nahin nikli

din Dhal gaya sham aa gai tare nikal aae

un ko kisi haalat mein na baKHshega kinara

auron ko Dubo kar jo kinare nikal aae

dekhe to koi mojaza-e-rabt-e-mohabbat

un aankhon se aaj ashk hamare nikal aae

jo chaho karo aaj se duniya hai tumhaari

apna jinhen samjha wo tumhaare nikal aae

KHud mil gae us but se mujhe kar ke nasihat

waiz bhi KHuda hi ke sanware nikal aae

ek aise buzurg aaj 'nazir' aa gae pine

mai-KHane se hum sharm ke mare nikal aae