tul-e-shab samne ek hijr ki tanhai hai

tūl-e-shab sāmne ik hijr kī tanhā.ī hai

dil ke bahlāne ko yādoñ kī masīhā.ī hai

dil hai labrez shikāyat se magar kyā kiije

pā-e-ādāb meñ zanjīr-e-shakebā.ī hai

un ke va.ada pe zarā maiñ jo yaqīñ karne lagā

bole ghabrā ke qasam ham ne nahīñ khaa.ī hai

zindagī bhar mujhe aañsū the rulā.e jis ne

chashm-e-tar le ke vo turbat pe mire aa.ī hai

ek shā'ir ke tasavvur se kahāñ chhuptā hai

band āñkhoñ meñ chhalaktī tirī parchhā.ī hai

ruk sī jaatī hai ghaTā kar ke tarashshuh kuchh dam

kis tazabzub meñ hai kyoñ aa ke yahāñ chhā.ī hai

kitnī ummīdoñ se āġhāz-e-safar karte haiñ

zindagī kyā hai faqat fāsla-paimā.ī hai

ham ne sīkhā hai ye nairang-e-zamāna se 'amīr'

na masīhā hai yahāñ aur na masīhā.ī hai

tul-e-shab samne ek hijr ki tanhai hai

dil ke bahlane ko yaadon ki masihai hai

dil hai labrez shikayat se magar kya kije

pa-e-adab mein zanjir-e-shakebai hai

un ke wada pe zara main jo yaqin karne laga

bole ghabra ke qasam hum ne nahin khai hai

zindagi bhar mujhe aansu the rulae jis ne

chashm-e-tar le ke wo turbat pe mere aai hai

ek sha'ir ke tasawwur se kahan chhupta hai

band aankhon mein chhalakti teri parchhai hai

ruk si jati hai ghaTa kar ke tarashshuh kuchh dam

kis tazabzub mein hai kyon aa ke yahan chhai hai

kitni ummidon se aaghaz-e-safar karte hain

zindagi kya hai faqat fasla-paimai hai

hum ne sikha hai ye nairang-e-zamana se 'amir'

na masiha hai yahan aur na masihai hai