TuT jae to kahin usko bhi chain aata hai

TuuT jaa.e to kahīñ us ko bhī chain aatā hai

dil-e-be-tāb taḌap kar hī sukūñ paatā hai

aap aate to Thahar jaate ye lamhe shāyad

vaqt ko yuuñ bhī guzarnā hai guzar jaatā hai

is tasavvur se ki shab bhar tirī rah dekheñge

shaam aatī hai to dil Duub ke rah jaatā hai

ġham kā ehsās bhī gumbad kī sadā ho jaise

dil se Takrātā hai phir dil meñ palaT aatā hai

vus.at-e-dīd nigāhoñ kā muqaddar na banī

aañkh ke til meñ to 'ālam bhī simaT aatā hai

ashk thamte haiñ to ho jaatī haiñ āñkheñ ḳhūñ-rañg

jaañ sañbhaltī hai to dil zabt se mar jaatā hai

koī nisbat hai tere naam se 'sīmīñ' varna

yuuñ kisī baat kā ilzām liyā jaatā hai

TuT jae to kahin us ko bhi chain aata hai

dil-e-be-tab taDap kar hi sukun pata hai

aap aate to Thahar jate ye lamhe shayad

waqt ko yun bhi guzarna hai guzar jata hai

is tasawwur se ki shab bhar teri rah dekhenge

sham aati hai to dil Dub ke rah jata hai

gham ka ehsas bhi gumbad ki sada ho jaise

dil se Takraata hai phir dil mein palaT aata hai

wusat-e-did nigahon ka muqaddar na bani

aankh ke til mein to 'alam bhi simaT aata hai

ashk thamte hain to ho jati hain aankhen KHun-rang

jaan sanbhalti hai to dil zabt se mar jata hai

koi nisbat hai tere nam se 'simin' warna

yun kisi baat ka ilzam liya jata hai