TuTa hua hai lakh safar ki thakan se

TuuTā huā hai laakh safar kī thakān se

sahrā-navard kaise kahe āsmān se

dīvār-o-dar se aage bhī duniyā hai ik mirī

ik shaḳhs kah rahā thā ye apne makān se

hosh-o-havās saath hī dete nahīñ mirā

mehmān ek jab se gayā hai makān se

le aayā hai jo hijr kī dahlīz par mujhe

niklegā kaise shaḳhs vo mere gumān se

ham ko tumhārī zulfoñ kī 'ādat bhī yuuñ paḌī

lagne lagī hai aañch hameñ sā.ebān se

sayyād ne havā meñ lagāyā hai aisā jaal

Darne lage haiñ saare parinde uḌaan se

bas gahrī niiñd ham ko sulānā na zindagī

kab ham ne haar maanī kisī imtihān se

is film meñ bhī koī maza ab nahīñ rahā

jab se vo shaḳhs rūThā hai is dāstān se

TuTa hua hai lakh safar ki thakan se

sahra-naward kaise kahe aasman se

diwar-o-dar se aage bhi duniya hai ek meri

ek shaKHs kah raha tha ye apne makan se

hosh-o-hawas sath hi dete nahin mera

mehman ek jab se gaya hai makan se

le aaya hai jo hijr ki dahliz par mujhe

niklega kaise shaKHs wo mere guman se

hum ko tumhaari zulfon ki 'adat bhi yun paDi

lagne lagi hai aanch hamein saeban se

sayyaad ne hawa mein lagaya hai aisa jal

Darne lage hain sare parinde uDan se

bas gahri nind hum ko sulana na zindagi

kab hum ne haar mani kisi imtihan se

is film mein bhi koi maza ab nahin raha

jab se wo shaKHs ruTha hai is dastan se