TuTa jo phul shaKH se taza nahin hua

TuuTā jo phuul shāḳh se taaza nahīñ huā

marne ke baa'd meñ koī zinda nahīñ huā

tanhā.iyoñ kī dhuup ne jhulsā diyā badan

ham par kisī kī zulf kā saaya nahīñ huā

itnā buland ho gayā majbūriyoñ kā qad

donoñ taraf se ek bhī shikva nahīñ huā

muddat huī ki dard kī lazzat na kam huī

piitā rahā sharāb maiñ nashsha nahīñ huā

ab tak hamāre paañv meñ Thokar nahīñ lagī

ab tak hamāre saath meñ dhoka nahīñ huā

āshiq kī badduā kā asar dekh lījiye

us bevafā kā aaj bhī rishta nahīñ huā

ġhairoñ se kyā umiid rakhī jā.egī bhalā

ham se hamāre dard pe girya nahīñ huā

kis darja ḳhush-mizāj haiñ ham ham se pūchhiye

apne hī qātiloñ pe bhī hamla nahīñ huā

jitnī hamāre dil ne tabāhī machā.ī hai

utnā to us kī zaat se ḳhatra nahīñ huā

ham mustaqil-mizāj savālī haiñ is liye

ḳhākī hamārī fikr kā kaasa nahīñ huā

tum kyā kisī ko ishq ke ma.ānī batāoge

goyā tumhārā sar sar-e-neza nahīñ huā

itnā ulajh gayā hai mire sher meñ vo shaḳhs

itnā ke us se Thiik se charba nahīñ huā

baḌh kar udāsiyoñ ko gale se lagā liyā

'mehvar' shab-e-firāq pe ġhussa nahīñ huā

TuTa jo phul shaKH se taza nahin hua

marne ke ba'd mein koi zinda nahin hua

tanhaiyon ki dhup ne jhulsa diya badan

hum par kisi ki zulf ka saya nahin hua

itna buland ho gaya majburiyon ka qad

donon taraf se ek bhi shikwa nahin hua

muddat hui ki dard ki lazzat na kam hui

pita raha sharab main nashsha nahin hua

ab tak hamare panw mein Thokar nahin lagi

ab tak hamare sath mein dhoka nahin hua

aashiq ki baddua ka asar dekh lijiye

us bewafa ka aaj bhi rishta nahin hua

ghairon se kya umid rakhi jaegi bhala

hum se hamare dard pe girya nahin hua

kis darja KHush-mizaj hain hum hum se puchhiye

apne hi qatilon pe bhi hamla nahin hua

jitni hamare dil ne tabahi machai hai

utna to us ki zat se KHatra nahin hua

hum mustaqil-mizaj sawali hain is liye

KHaki hamari fikr ka kasa nahin hua

tum kya kisi ko ishq ke maani bataoge

goya tumhaara sar sar-e-neza nahin hua

itna ulajh gaya hai mere sher mein wo shaKHs

itna ke us se Thik se charba nahin hua

baDh kar udasiyon ko gale se laga liya

'mehwar' shab-e-firaq pe ghussa nahin hua