TuTa phuTa sahi ehsas-e-ana hai mujh mein

TuuTā phūTā sahī ehsās-e-anā hai mujh meñ

aisā lagtā hai koī aur chhupā hai mujh meñ

kirchiyāñ shīshe kī paikar meñ nihāñ haiñ mere

aks-dar-aks koī sañg-numā hai mujh meñ

ab vo shorīda-sarī hai na vo jazboñ kī sadā

bas ufuq-tā-ba-ufuq ek ḳhalā hai mujh meñ

ḳhvāb-dar-ḳhvāb mirā phūloñ kī vaadī kā safar

aañkh khul jaa.e to ik dasht-e-balā hai mujh meñ

satvat-e-jabr vahī rañg kī dīvār vahī

ek ehsās hai jo mujh se sivā hai mujh meñ

har nafas merā sulagte hue ḳhvāboñ kā dhuāñ

ārzūoñ kā koī shahr jalā hai mujh meñ

suntā rahtā huuñ maiñ mazlūm kī chīḳheñ bhī 'sarūp'

yā ki paikar kisī qātil kā chubhā hai mujh meñ

TuTa phuTa sahi ehsas-e-ana hai mujh mein

aisa lagta hai koi aur chhupa hai mujh mein

kirchiyan shishe ki paikar mein nihan hain mere

aks-dar-aks koi sang-numa hai mujh mein

ab wo shorida-sari hai na wo jazbon ki sada

bas ufuq-ta-ba-ufuq ek KHala hai mujh mein

KHwab-dar-KHwab mera phulon ki wadi ka safar

aankh khul jae to ek dasht-e-bala hai mujh mein

satwat-e-jabr wahi rang ki diwar wahi

ek ehsas hai jo mujh se siwa hai mujh mein

har nafas mera sulagte hue KHwabon ka dhuan

aarzuon ka koi shahr jala hai mujh mein

sunta rahta hun main mazlum ki chiKHen bhi 'sarup'

ya ki paikar kisi qatil ka chubha hai mujh mein