TuTa tha aasman se tara kahan gaya

TuuTā thā āsmān se taarā kahāñ gayā

DhūñDā bahut use vo bichāra kahāñ gayā

us ne kahā thā sehr nasīboñ meñ hai tire

palkoñ ye sub.h kā thā sitārā kahāñ gayā

sadiyoñ ke is makāñ meñ bahut der tak rahā

mujh meñ jo thā vo sirf tumhārā kahāñ gayā

biite dinoñ kī raakh abhī tak hai garm-tar

sho'la diyā thā us meñ hamārā kahāñ gayā

baiThe the jis dukāñ ke thaḌe par tamām 'umr

ab dekhte haiñ us kā sahārā kahāñ gayā

detā thā jo sadā dar-e-hijrāñ pe raat bhar

galiyoñ meñ phir rahā thā jo maarā kahāñ gayā

uThThā hai dhaḌkanoñ kā 'ajab shor be-panāh

vo ās-pās thā jo hamārā kahāñ gayā

'altāf' shahr ghuum ke aayā huuñ aaj phir

vo log haiñ kahāñ vo shikārā kahāñ gayā

TuTa tha aasman se tara kahan gaya

DhunDa bahut use wo bichaara kahan gaya

us ne kaha tha sehr nasibon mein hai tere

palkon ye subh ka tha sitara kahan gaya

sadiyon ke is makan mein bahut der tak raha

mujh mein jo tha wo sirf tumhaara kahan gaya

bite dinon ki rakh abhi tak hai garm-tar

sho'la diya tha us mein hamara kahan gaya

baiThe the jis dukan ke thaDe par tamam 'umr

ab dekhte hain us ka sahaara kahan gaya

deta tha jo sada dar-e-hijran pe raat bhar

galiyon mein phir raha tha jo mara kahan gaya

uThTha hai dhaDkanon ka 'ajab shor be-panah

wo aas-pas tha jo hamara kahan gaya

'altaf' shahr ghum ke aaya hun aaj phir

wo log hain kahan wo shikara kahan gaya