TuTa tilism-e-waqt to kya dekhta hun main

TuuTā tilism-e-vaqt to kyā dekhtā huuñ maiñ

ab tak usī jagah pe akelā khaḌā huuñ maiñ

ye kashmakash alag hai ki kis kashmakash meñ huuñ

aatā nahīñ samajh meñ bahut sochtā huuñ maiñ

maiñ ahl to nahīñ huuñ ki dekhe koī magar

duniyā mujhe bhī dekh tirā aa.inā huuñ maiñ

aksar ġhurūr-e-fikr jab utrā dimāġh se

maiñ dañg rah gayā ki ye kyā likh gayā huuñ maiñ

merā kalām vah.i nahīñ hai to phir mujhe

ye zo'm kyuuñ na ho ki ḳhud apnā ḳhudā huuñ maiñ

mujh se nahīñ use mire fardā se hai umiid

manzil se koī aur faqat rāsta huuñ maiñ

kyā fā.eda mujhe jo palaT kar javāb duuñ

apne liye kahāñ huuñ burā yā bhalā huuñ maiñ

ġhāfil ab aur kyā huuñ kisī se ki 'umr bhar

āvārgī kī god meñ sotā rahā huuñ maiñ

kyā ye jagah hai jis kī tamannā meñ aaj tak

din raat shahr shahr bhaTaktā phirā huuñ maiñ

mash.al-ba-dast ghūmte guzrī hai ek 'umr

ab kis ke intizār meñ Thahrā huā huuñ maiñ

TuTa tilism-e-waqt to kya dekhta hun main

ab tak usi jagah pe akela khaDa hun main

ye kashmakash alag hai ki kis kashmakash mein hun

aata nahin samajh mein bahut sochta hun main

main ahl to nahin hun ki dekhe koi magar

duniya mujhe bhi dekh tera aaina hun main

aksar ghurur-e-fikr jab utra dimagh se

main dang rah gaya ki ye kya likh gaya hun main

mera kalam wahi nahin hai to phir mujhe

ye zo'm kyun na ho ki KHud apna KHuda hun main

mujh se nahin use mere farda se hai umid

manzil se koi aur faqat rasta hun main

kya faeda mujhe jo palaT kar jawab dun

apne liye kahan hun bura ya bhala hun main

ghafil ab aur kya hun kisi se ki 'umr bhar

aawargi ki god mein sota raha hun main

kya ye jagah hai jis ki tamanna mein aaj tak

din raat shahr shahr bhaTakta phira hun main

mashal-ba-dast ghumte guzri hai ek 'umr

ab kis ke intizar mein Thahra hua hun main