TuTta hun kabhi juDta hun main

TūTtā huuñ kabhī juḌtā huuñ maiñ

jāgtī aañkh kā sapnā huuñ maiñ

apnī sūrat ko tarastā huuñ maiñ

aa.ina DhūñDne niklā huuñ maiñ

kabhī pinhāñ kabhī paidā huuñ maiñ

kis fusūñ-gar kā tamāshā huuñ maiñ

ḳhalish-e-ḳhār kabhī nik.hat-e-gul

har-nafas rañg badaltā huuñ maiñ

dekhiye kis kī nazar paḌtī hai

kab se showcase meñ rakkhā huuñ maiñ

koī tiryāk nahīñ merā ilaaj

kushta-e-zahr-e-tamannā huuñ maiñ

kabhī uThte haiñ mire daam bahut

kabhī be-mol bhī mahñgā huuñ maiñ

koī pahchāne to kyā pahchāne

kabhī sūrat kabhī saayā huuñ maiñ

ātish-e-ġham kī tamāzat ke nisār

jitnā taptā huuñ nikhartā huuñ maiñ

koī jaada hai na manzil 'sābir'

apne hī gird bhaTaktā huuñ maiñ

TuTta hun kabhi juDta hun main

jagti aankh ka sapna hun main

apni surat ko tarasta hun main

aaina DhunDne nikla hun main

kabhi pinhan kabhi paida hun main

kis fusun-gar ka tamasha hun main

KHalish-e-KHar kabhi nikhat-e-gul

har-nafas rang badalta hun main

dekhiye kis ki nazar paDti hai

kab se showcase mein rakkha hun main

koi tiryak nahin mera ilaj

kushta-e-zahr-e-tamanna hun main

kabhi uThte hain mere dam bahut

kabhi be-mol bhi mahnga hun main

koi pahchane to kya pahchane

kabhi surat kabhi saya hun main

aatish-e-gham ki tamazat ke nisar

jitna tapta hun nikharta hun main

koi jada hai na manzil 'sabir'

apne hi gird bhaTakta hun main