TuTte girte nagar mein sab hue na-ashna

TūTte girte nagar meñ sab hue nā-āshnā

bastī bastī DhūñDhiye ab ek chehra āshnā

yaañ to sab ko apnī hī pahchān dūbhar ho chalī

andhe bahroñ ke nagar meñ kaun kis kā āshnā

be-basīrat ham the maanā muḳhlisoñ kī bhiiḌ meñ

tum ne pahchānā kisī ko tum ne paayā āshnā

sard-mehrī kī ridā oḌhe hue hai bashar

kyā koī apnā shanāsā kyā koī nā-āshnā

ham ko sab ma.alūm hai hone ko hai kyā is ke baad

tum tamāshā-gar ho sāhab ham tamāshā-āshnā

koī to aisā bhī ho 'arshad' jise maiñ kah sakūñ

merī shaḳhsiyyat kā pārakh mere ġham kā āshnā

TuTte girte nagar mein sab hue na-ashna

basti basti DhunDhiye ab ek chehra aashna

yan to sab ko apni hi pahchan dubhar ho chali

andhe bahron ke nagar mein kaun kis ka aashna

be-basirat hum the mana muKHlison ki bhiD mein

tum ne pahchana kisi ko tum ne paya aashna

sard-mehri ki rida oDhe hue hai bashar

kya koi apna shanasa kya koi na-ashna

hum ko sab malum hai hone ko hai kya is ke baad

tum tamasha-gar ho sahab hum tamasha-ashna

koi to aisa bhi ho 'arshad' jise main kah sakun

meri shaKHsiyyat ka parakh mere gham ka aashna