TuTte hi rahne ka silsila diya mujhko

TūTte hī rahne kā silsila diyā mujh ko

us ne zindagī to dī par rulā diyā mujh ko

sochtā huuñ kis-kis ko yaad rakkhūñ duniyā meñ

kuchh na kuchh sabhī ne hai tajraba diyā mujh ko

hārne lagā thā vo mujh se laḌte-laḌte jab

us ne duniyā kī nazroñ meñ harā diyā mujh ko

ham ne hī sikhāyā jis ko salīqa jalne kā

ek shab usī diye ne bujhā diyā mujh ko

maiñ ne sab se kal maiḳhāne kā rasta pūchhā thā

sab ne us kī āñkhoñ kā hī pata diyā mujh ko

kaise maiñ zamāne kī nazroñ se guzar paatā

sach thā maiñ sabhī ne mil kar dabā diyā mujh ko

TuTte hi rahne ka silsila diya mujh ko

us ne zindagi to di par rula diya mujh ko

sochta hun kis-kis ko yaad rakkhun duniya mein

kuchh na kuchh sabhi ne hai tajraba diya mujh ko

haarne laga tha wo mujh se laDte-laDte jab

us ne duniya ki nazron mein hara diya mujh ko

hum ne hi sikhaya jis ko saliqa jalne ka

ek shab usi diye ne bujha diya mujh ko

main ne sab se kal maiKHane ka rasta puchha tha

sab ne us ki aankhon ka hi pata diya mujh ko

kaise main zamane ki nazron se guzar pata

sach tha main sabhi ne mil kar daba diya mujh ko