ubalte paniyon mein hun kahan ubaal ki tarah

ubalte pāniyoñ meñ huuñ kahāñ ubaal kī tarah

maiñ aaj bhī huuñ tah-nashīñ guzishta saal kī tarah

diloñ meñ sab ke chubh rahī hai ik savāl kī tarah

tirī nigāh-e-yās bhī hai mere haal kī tarah

karūñgā tujh se guftugū zarā Thahar nimaT to luuñ

khaḌā hai koī beach meñ abhī savāl kī tarah

na pūchh mujh se haal dil ki in dinoñ hai zindagī

kisī urūj-e-dīda kī shab-e-zavāl kī tarah

vo ek yaad jo abhī hai dāġh-e-dil banī huī

phisal na jaa.e zehn se kisī ḳhayāl kī tarah

na pūchh 'qaisar'-e-hazīñ ajiib sī vo chiiz hai

bichhī huī hai shahr meñ jo ek jaal kī tarah

ubalte paniyon mein hun kahan ubaal ki tarah

main aaj bhi hun tah-nashin guzishta sal ki tarah

dilon mein sab ke chubh rahi hai ek sawal ki tarah

teri nigah-e-yas bhi hai mere haal ki tarah

karunga tujh se guftugu zara Thahar nimaT to lun

khaDa hai koi beach mein abhi sawal ki tarah

na puchh mujh se haal dil ki in dinon hai zindagi

kisi uruj-e-dida ki shab-e-zawal ki tarah

wo ek yaad jo abhi hai dagh-e-dil bani hui

phisal na jae zehn se kisi KHayal ki tarah

na puchh 'qaisar'-e-hazin ajib si wo chiz hai

bichhi hui hai shahr mein jo ek jal ki tarah