ubhre jo KHak se wo tah-e-KHak ho gae

ubhre jo ḳhaak se vo tah-e-ḳhāk ho ga.e

sab pā.emāl-e-gardish-e-aflāk ho ga.e

rakhtī thī laag mere garebāñ se nau-bahār

dāman guloñ ke baaġh meñ kyuuñ chaak ho ga.e

the dīda-hā-e-ḳhushk mohabbat kī aabrū

kam-baḳht un ke sāmne namnāk ho ga.e

aisā bhī kyā mizāj qayāmat kā din hai aaj

pesh-e-ḳhudā tum aur bhī bebāk ho ga.e

aate hī bazm-e-vāz se chalte bane 'hafīz'

do harf sun ke sāhib-e-idrāk ho ga.e

ubhre jo KHak se wo tah-e-KHak ho gae

sab paemal-e-gardish-e-aflak ho gae

rakhti thi lag mere gareban se nau-bahaar

daman gulon ke bagh mein kyun chaak ho gae

the dida-ha-e-KHushk mohabbat ki aabru

kam-baKHt un ke samne namnak ho gae

aisa bhi kya mizaj qayamat ka din hai aaj

pesh-e-KHuda tum aur bhi bebak ho gae

aate hi bazm-e-waz se chalte bane 'hafiz'

do harf sun ke sahib-e-idrak ho gae