uDa kar kag shishe se mai-e-gul-gun nikalti hai

uḌā kar kaag shīshe se mai-e-gul-gūñ nikaltī hai

sharābī jam.a haiñ mai-ḳhāna meñ Topī uchhaltī hai

bahār-e-mai-kashī aa.ī chaman kī rut badaltī hai

ghaTā mastāna uThtī hai havā mastāna chaltī hai

za-ḳhud-rafta tabī.at kab sambhāle se sambhaltī hai

na ban aatī hai nāseh se na kuchh vaa.iz kī chaltī hai

ye kis kī hai tamannā chuTkiyāñ letī hai jo dil meñ

ye kis kī aarzū hai jo kaleje ko masaltī hai

vo dīvāna hai jo is fasl meñ fasdeñ na khulvā.e

rag-e-har-shāḳh-e-gul se ḳhuun kī naddī ubaltī hai

sahar hote hī dam niklā ġhash aate hī ajal aa.ī

kahāñ huuñ maiñ nasīm-e-sub.h pañkhā kis ko jhaltī hai

tamatto ek kā hai ek ke nuqsāñ se aalam meñ

ki saaya phailtā jaatā hai juuñ juuñ dhuup Dhaltī hai

binā rakkhī hai ġham par ziist kī ye ho gayā sābit

na lapkā aah kā chhūTegā jab tak saañs chaltī hai

qarār ik dam nahīñ aatā hai ḳhūn-e-be-gunah pī kar

ki ab to ḳhud ba-ḳhud talvār rah rah kar ugaltī hai

jahannam kī na aañch aa.egī mai-ḳhvāroñ pe o vaa.iz

sharāb ālūda ho jo shai vo kab ātish meñ jaltī hai

na dikhlānā ilāhī ek aafat hai shab-e-furqat

na jo kaaTe se kaTtī hai na jo Taale se Taltī hai

ye achchhā shuġhl vahshat meñ nikālā tū ne ai 'haidar'

garebāñ meñ ulajhne se tabī.at to bahaltī hai

uDa kar kag shishe se mai-e-gul-gun nikalti hai

sharabi jama hain mai-KHana mein Topi uchhalti hai

bahaar-e-mai-kashi aai chaman ki rut badalti hai

ghaTa mastana uThti hai hawa mastana chalti hai

za-KHud-rafta tabiat kab sambhaale se sambhalti hai

na ban aati hai naseh se na kuchh waiz ki chalti hai

ye kis ki hai tamanna chuTkiyan leti hai jo dil mein

ye kis ki aarzu hai jo kaleje ko masalti hai

wo diwana hai jo is fasl mein fasden na khulwae

rag-e-har-shaKH-e-gul se KHun ki naddi ubalti hai

sahar hote hi dam nikla ghash aate hi ajal aai

kahan hun main nasim-e-subh pankha kis ko jhalti hai

tamatto ek ka hai ek ke nuqsan se aalam mein

ki saya phailta jata hai jun jun dhup Dhalti hai

bina rakkhi hai gham par zist ki ye ho gaya sabit

na lapka aah ka chhuTega jab tak sans chalti hai

qarar ek dam nahin aata hai KHun-e-be-gunah pi kar

ki ab to KHud ba-KHud talwar rah rah kar ugalti hai

jahannam ki na aanch aaegi mai-KHwaron pe o waiz

sharab aaluda ho jo shai wo kab aatish mein jalti hai

na dikhlana ilahi ek aafat hai shab-e-furqat

na jo kaTe se kaTti hai na jo Tale se Talti hai

ye achchha shughl wahshat mein nikala tu ne ai 'haidar'

gareban mein ulajhne se tabiat to bahalti hai