udas ho gai shabnam jahan sahar aai

udaas ho ga.ī shabnam jahāñ sahar aa.ī

ġham-e-firāq se phūloñ kī aañkh bhar aa.ī

sahar ke saath shab-e-ġham ga.ī magar aa.ī

huī jo shaam to ghar apne lauT kar aa.ī

musāfirān-e-mohabbat ko kuchh ḳhabar hī nahīñ

ki shaam kab ga.ī aa.ī to kab sahar aa.ī

udhār maañg ke yuuñ laa.ī zindagī ḳhushiyāñ

ki jaise shāhid-e-bāzār maañg bhar aa.ī

tumhārā ġham bhī vahāñ ġham nahīñ rahā ai dost

udaas jab koī sūrat hameñ nazar aa.ī

na āftāb ko thā chain justujū meñ tirī

na niiñd chāñd sitāroñ ko raat bhar aa.ī

tire baġhair bhī guzrī hai zindagī lekin

ḳhushī kī shaam na to sub.h-e-mo'atabar aa.ī

rahe udaas to ham muddatoñ udaas rahe

hañsī jo aa.ī to phir baat baat par aa.ī

patā na chal sakā tārīk rāstoñ kā 'fahīm'

bichhaḌne vāloñ kī ab tak na kuchh ḳhabar aa.ī

udas ho gai shabnam jahan sahar aai

gham-e-firaq se phulon ki aankh bhar aai

sahar ke sath shab-e-gham gai magar aai

hui jo sham to ghar apne lauT kar aai

musafiran-e-mohabbat ko kuchh KHabar hi nahin

ki sham kab gai aai to kab sahar aai

udhaar mang ke yun lai zindagi KHushiyan

ki jaise shahid-e-bazar mang bhar aai

tumhaara gham bhi wahan gham nahin raha ai dost

udas jab koi surat hamein nazar aai

na aaftab ko tha chain justuju mein teri

na nind chand sitaron ko raat bhar aai

tere baghair bhi guzri hai zindagi lekin

KHushi ki sham na to subh-e-mo'atabar aai

rahe udas to hum muddaton udas rahe

hansi jo aai to phir baat baat par aai

pata na chal saka tarik raston ka 'fahim'

bichhaDne walon ki ab tak na kuchh KHabar aai