udas ek roz kar gaya main to kya karoge

udaas ik roz kar gayā maiñ to kyā karoge

tumhārā shā.ir huuñ mar gayā maiñ to kyā karoge

hazār hāthoñ se maiñ sameTe hue huuñ tum ko

agar kahīñ ḳhud bikhar gayā maiñ to kyā karoge

mire qadam se qadam milā kar to chal rahe ho

jo tum se aage guzar gayā maiñ to kyā karoge

kise pukāroge aur kis ko sadā.eñ doge

sukūt-e-jāñ meñ utar gayā meñ to kyā karoge

jo dard sā kā.enāt meñ hai vo dard ban kar

tumhāre dil meñ utar gayā maiñ to kyā karoge

tumhārī zulfoñ se khelte khelte kisī roz

havā se aage guzar gayā maiñ to kyā karoge

jo ham ne khaa.ī thiiñ jiine marne kī saath qasmeñ

agar vo ḳhud toḌ kar gayā maiñ to karoge

udas ek roz kar gaya main to kya karoge

tumhaara shair hun mar gaya main to kya karoge

hazar hathon se main sameTe hue hun tum ko

agar kahin KHud bikhar gaya main to kya karoge

mere qadam se qadam mila kar to chal rahe ho

jo tum se aage guzar gaya main to kya karoge

kise pukaroge aur kis ko sadaen doge

sukut-e-jaan mein utar gaya mein to kya karoge

jo dard sa kaenat mein hai wo dard ban kar

tumhaare dil mein utar gaya main to kya karoge

tumhaari zulfon se khelte khelte kisi roz

hawa se aage guzar gaya main to kya karoge

jo hum ne khai thin jine marne ki sath qasmen

agar wo KHud toD kar gaya main to karoge