udas kar ke mujhe muskura rahi ho tum

udaas kar ke mujhe muskurā rahī ho tum

kahāñ kī iiñT kahāñ ab lagā rahī ho tum

fishār-e-ḳhūn to pahle bhī kab hai qaabū meñ

kyoñ is pe aur dabāo baḌhā rahī ho tum

go iḳhtiyār kī hai be-ruḳhī bahut din se

gudāz-e-dil ko magar gudgudā rahī ho tum

bahut nafīs qarīne haiñ vaar karne ke

fareb-e-husn ke fitne jagā rahī ho tum

tumheñ zarā bhī lagāvaT na vasl se thī kabhī

so mere hijr meñ aañsū bahā rahī ho tum

na tum ko farq hai ma.alūm ishq-o-ātish kā

jo 'āftāb' se nazreñ milā rahī ho tum

udas kar ke mujhe muskura rahi ho tum

kahan ki inT kahan ab laga rahi ho tum

fishaar-e-KHun to pahle bhi kab hai qabu mein

kyon is pe aur dabao baDha rahi ho tum

go iKHtiyar ki hai be-ruKHi bahut din se

gudaz-e-dil ko magar gudguda rahi ho tum

bahut nafis qarine hain war karne ke

fareb-e-husn ke fitne jaga rahi ho tum

tumhein zara bhi lagawaT na wasl se thi kabhi

so mere hijr mein aansu baha rahi ho tum

na tum ko farq hai malum ishq-o-atish ka

jo 'aftab' se nazren mila rahi ho tum