udas raat hai aur har diya bujha hua hai

udaas raat hai aur har diyā bujhā huā hai

ye hādisa to mire saath bārhā huā hai

kuchh aisā ḳhauf musallat hai āj-kal dil par

siyāh raat se jaise koī Darā huā hai

vo aa.ine se huā rū-barū to chīḳh paḌā

tumhārī vaj.h se jo bhī huā burā huā hai

na.ī tarah ke taqāzoñ kā qufl hai dar par

magar vo vā'da jo dahlīz par paḌā huā hai

ye karb had se ziyāda hai ab jahāñ meñ tire

jahāñ-jahāñ bhī mirā naam thā miTā huā hai

har ek buuñd meñ pinhāñ haiñ dard kī Tīseñ

zarūr bārishoñ meñ ashk bhī milā huā hai

tumhārā mujh se ta'alluq hai māvarā 'māhī'

jo zāhiran to judā hai magar juḌā huā hai

udas raat hai aur har diya bujha hua hai

ye hadisa to mere sath barha hua hai

kuchh aisa KHauf musallat hai aaj-kal dil par

siyah raat se jaise koi Dara hua hai

wo aaine se hua ru-baru to chiKH paDa

tumhaari wajh se jo bhi hua bura hua hai

nai tarah ke taqazon ka qufl hai dar par

magar wo wa'da jo dahliz par paDa hua hai

ye karb had se ziyaada hai ab jahan mein tere

jahan-jahan bhi mera nam tha miTa hua hai

har ek bund mein pinhan hain dard ki Tisen

zarur barishon mein ashk bhi mila hua hai

tumhaara mujh se ta'alluq hai mawara 'mahi'

jo zahiran to juda hai magar juDa hua hai