udas udas faza kaenat Thahri hai

udaas udaas fazā kā.enāt Thahrī hai

laboñ pe sab ke koī sachchī baat Thahrī hai

ajab sukūt kā manzar hai saare aalam meñ

hai vaqt Thahrā huā aur hayāt Thahrī hai

ufuq pe shams kī aamad kā shor hai kab se

is intizār meñ ab tak ye raat Thahrī hai

kisī kī ziist kā ruknā muhāl hai lekin

kisī ke vāste aksar vafāt Thahrī hai

darinde dasht farishte falak pe Thahr ga.e

zamīñ pe sirf hamārī hī zaat Thahrī hai

ye chand sikke kamā kar ḳhushī se phūlo mat

tumhārī fat.h ke andar hī maat Thahrī hai

tamām log chale jaa.eñ kyā bayābāñ meñ

ki bastiyoñ meñ qazā kī barāt Thahrī hai

sharīf-zādoñ ne 'ehsās' tauba kar lī kyā

hamāre shahr meñ kyoñ vārdāt Thahrī hai

udas udas faza kaenat Thahri hai

labon pe sab ke koi sachchi baat Thahri hai

ajab sukut ka manzar hai sare aalam mein

hai waqt Thahra hua aur hayat Thahri hai

ufuq pe shams ki aamad ka shor hai kab se

is intizar mein ab tak ye raat Thahri hai

kisi ki zist ka rukna muhaal hai lekin

kisi ke waste aksar wafat Thahri hai

darinde dasht farishte falak pe Thahr gae

zamin pe sirf hamari hi zat Thahri hai

ye chand sikke kama kar KHushi se phulo mat

tumhaari fath ke andar hi mat Thahri hai

tamam log chale jaen kya bayaban mein

ki bastiyon mein qaza ki baraat Thahri hai

sharif-zadon ne 'ehsas' tauba kar li kya

hamare shahr mein kyon wardat Thahri hai