udas udas the hum usko ek zamana hua

udaas udaas the ham us ko ik zamāna huā

ġhazal kā aa.ina dekhā to muskurānā huā

na jaane kitne hī ḳhabroñ ne ḳhud-kushī kar lī

chalo ki aaj kā aḳhbār bhī purānā huā

phir aaj biite hue mausamoñ kī yaad aa.ī

phir aaj reñgte lamhoñ se dostāna huā

ye band kamre kī tanhā.iyoñ kā ġhul thā ki phir

hamāre vahm par ik vaar qātilāna huā

vo fāḳhta thī jise goliyoñ ne bhuun diyā

ye qatl sehn-e-gulistāñ meñ jārehāna huā

hamārā shahr rahā sirf valvaloñ kā hī shahr

use nasīb kahāñ zalzale ugānā huā

vo munhadim sahī dīvār to milī ai 'rind'

usī ke saa.e meñ taskīn kā Thikānā huā

udas udas the hum us ko ek zamana hua

ghazal ka aaina dekha to muskurana hua

na jaane kitne hi KHabron ne KHud-kushi kar li

chalo ki aaj ka aKHbar bhi purana hua

phir aaj bite hue mausamon ki yaad aai

phir aaj rengte lamhon se dostana hua

ye band kamre ki tanhaiyon ka ghul tha ki phir

hamare wahm par ek war qatilana hua

wo faKHta thi jise goliyon ne bhun diya

ye qatl sehn-e-gulistan mein jarehana hua

hamara shahr raha sirf walwalon ka hi shahr

use nasib kahan zalzale ugana hua

wo munhadim sahi diwar to mili ai 'rind'

usi ke sae mein taskin ka Thikana hua