udasi hi udasi hai baDe bezar baiThe hain

udāsī hī udāsī hai baḌe bezār baiThe haiñ

na jaane kyā vo baazī thī jise ham haar baiThe haiñ

havā ke haath meñ hai uf ye kis mausam kā parvāna

parinde phir paroñ meñ Daal kar minqār baiThe haiñ

mashīnoñ ke sukūñ-nā-āshnā is daur meñ yaaro

kahāñ vo log jo kahte the ham bekār baiThe haiñ

kisī dīvār kā saaya ki koī moḌ kā patthar

jahāñ baiThe haiñ goyā dar-ḳhur-e-āzār baiThe haiñ

usī kā naam hai shāyad rah-e-ulfat kī majbūrī

kahīñ se be-sabab uTThe kahīñ nā-chār baiThe haiñ

inhī logoñ ne maujoñ ko safīnoñ kī adā dī hai

abhī us paar aTke the jo ab is paar baiThe haiñ

niyāz-o-nāz kī vo kashmakash bhī ab kahāñ 'rāhī'

jise ham dil samajhte the use bhī maar baiThe haiñ

udasi hi udasi hai baDe bezar baiThe hain

na jaane kya wo bazi thi jise hum haar baiThe hain

hawa ke hath mein hai uf ye kis mausam ka parwana

parinde phir paron mein Dal kar minqar baiThe hain

mashinon ke sukun-na-ashna is daur mein yaro

kahan wo log jo kahte the hum bekar baiThe hain

kisi diwar ka saya ki koi moD ka patthar

jahan baiThe hain goya dar-KHur-e-azar baiThe hain

usi ka nam hai shayad rah-e-ulfat ki majburi

kahin se be-sabab uTThe kahin na-chaar baiThe hain

inhi logon ne maujon ko safinon ki ada di hai

abhi us par aTke the jo ab is par baiThe hain

niyaz-o-naz ki wo kashmakash bhi ab kahan 'rahi'

jise hum dil samajhte the use bhi mar baiThe hain