udasiyan baDi neamat hai gham ke maron mein

udāsiyāñ baḌī ne.amat hai ġham ke māroñ meñ

ginā na jaa.e hameñ ab se be-sahāroñ meñ

sazā milī hai judā.ī kī tā-azal un ko

huā thā ishq samundar ke do kināroñ meñ

sukūn-e-dīd ko achchhe haiñ rang phūloñ ke

sukūn-e-dil kise miltā hai in bahāroñ meñ

ab aa.ine se nikalnā bahut zarūrī hai

raheñge aur na chehre ke tābe'dāroñ meñ

vo dekhtā hai mujhe mujh ko aisā lagtā hai

ye rang yūñhī nahīñ phailte nazāroñ meñ

falak pe kaise vo miltā jo dil meñ thā mere

maiñ DhūñDhtī rahī shab bhar use sitāroñ meñ

ḳhudā kā shukr ki shab mujh pe aa ga.ī 'mīrā'

maiñ thak ga.ī thī bahut din ke regzāroñ meñ

udasiyan baDi neamat hai gham ke maron mein

gina na jae hamein ab se be-sahaaron mein

saza mili hai judai ki ta-azal un ko

hua tha ishq samundar ke do kinaron mein

sukun-e-did ko achchhe hain rang phulon ke

sukun-e-dil kise milta hai in bahaaron mein

ab aaine se nikalna bahut zaruri hai

rahenge aur na chehre ke tabe'daron mein

wo dekhta hai mujhe mujh ko aisa lagta hai

ye rang yunhi nahin phailte nazaron mein

falak pe kaise wo milta jo dil mein tha mere

main DhunDhti rahi shab bhar use sitaron mein

KHuda ka shukr ki shab mujh pe aa gai 'mira'

main thak gai thi bahut din ke regzaron mein