uDti hui miTTi hai dil apna koi din mein

uḌtī huī miTTī hai dil apnā koī din meñ

miTne ko hai ye naqsh-e-tamannā koī din meñ

kuchh roz hai lau dete hue dhyān kī garmī

bujhtā nazar aatā hai ye sho'la koī din meñ

tā-chand ye tuġhyānī-e-sad-mauja-e-ehsās

hai ek rag-e-sang ye dariyā koī din meñ

hai baat koī din kī ye hangāma-e-hastī

lā-raib ujaḌtā hai ye mela koī din meñ

har qasr-e-'anāsir kī hai taqdīr meñ girnā

har sūrat-e-zebā hai fasāna koī din meñ

hāsil hai yahāñ kis ko davām-o-abadiyyat

har shahr hai ik gosha-e-sahrā koī din meñ

ā.eñge na phir lauT ke ai yār-e-kam-āmez

uThne ko haiñ arbāb-e-taqāzā koī din meñ

kho jā.uñgā is dasht kī vus'at meñ kahīñ maiñ

DhūñDoge mire naqsh-e-kaf-e-pā koī din meñ

pohñchā hī samajh mujh ko nadīm-e-'adam-ābād

tai hone ko hai manzil-e-duniyā koī din meñ

kuchh haal 'bashīr' aaj digar-gūñ sā lagā hai

kartā hai ye darvesh bhī parda koī din meñ

uDti hui miTTi hai dil apna koi din mein

miTne ko hai ye naqsh-e-tamanna koi din mein

kuchh roz hai lau dete hue dhyan ki garmi

bujhta nazar aata hai ye sho'la koi din mein

ta-chand ye tughyani-e-sad-mauja-e-ehsas

hai ek rag-e-sang ye dariya koi din mein

hai baat koi din ki ye hangama-e-hasti

la-raib ujaDta hai ye mela koi din mein

har qasr-e-'anasir ki hai taqdir mein girna

har surat-e-zeba hai fasana koi din mein

hasil hai yahan kis ko dawam-o-abadiyyat

har shahr hai ek gosha-e-sahra koi din mein

aaenge na phir lauT ke ai yar-e-kam-amez

uThne ko hain arbab-e-taqaza koi din mein

kho jaunga is dasht ki wus'at mein kahin main

DhunDoge mere naqsh-e-kaf-e-pa koi din mein

pohncha hi samajh mujh ko nadim-e-'adam-abaad

tai hone ko hai manzil-e-duniya koi din mein

kuchh haal 'bashir' aaj digar-gun sa laga hai

karta hai ye darwesh bhi parda koi din mein