uf intiha-e-shauq mein ab kya kare koi

uf intihā-e-shauq meñ ab kyā kare koī

kahte haiñ pahle apnī tamanna kare koī

bedād-e-husn ye hai to phir kyā kare koī

rusvā.iyoñ ke baad bhī parvā kare koī

tum bhī kaho to dil ko batā deñ ab is kā haal

ab vaqt vo nahīñ hai ki pardā kare koī

khul jaa.eñ husn-o-ishq kī nairangiyoñ ke raaz

dekhūñ jo phir kisī kī tamanna kare koī

bad-nāmiyāñ nasīb meñ haiñ sab ke varna yaañ

koī na kuchh miTā.e na paidā kare koī

kuchh aisā haal hai kisī bīmār-e-ishq kā

vo ḳhud bhī kah rahe haiñ ki ab kyā kare koī

jhalkegā iḳhtiyār meñ mahbūbiyoñ kā rang

merī nazar se gul kā tamāshā kare koī

zarroñ meñ gūñjtī hai sadā-e-shikast-e-dil

hai shart gosh-e-dil ko magar vā kare koī

jab kuchh samajhne deñ na kisī kī tajalliyāñ

phir kyoñ mire ḳhayāl ko rusvā kare koī

hai zarra zarra mahshar-e-āshob-e-shauq-e-dīd

ab vaqt aa gayā hai ki pardā kare koī

gum ho chukī hai qudrat-e-ibdā-e-ārzū

'beḳhud' harīm-e-nāz to hai kyā kare koī

uf intiha-e-shauq mein ab kya kare koi

kahte hain pahle apni tamanna kare koi

bedad-e-husn ye hai to phir kya kare koi

ruswaiyon ke baad bhi parwa kare koi

tum bhi kaho to dil ko bata den ab is ka haal

ab waqt wo nahin hai ki parda kare koi

khul jaen husn-o-ishq ki nairangiyon ke raaz

dekhun jo phir kisi ki tamanna kare koi

bad-namiyan nasib mein hain sab ke warna yan

koi na kuchh miTae na paida kare koi

kuchh aisa haal hai kisi bimar-e-ishq ka

wo KHud bhi kah rahe hain ki ab kya kare koi

jhalkega iKHtiyar mein mahbubiyon ka rang

meri nazar se gul ka tamasha kare koi

zarron mein gunjti hai sada-e-shikast-e-dil

hai shart gosh-e-dil ko magar wa kare koi

jab kuchh samajhne den na kisi ki tajalliyan

phir kyon mere KHayal ko ruswa kare koi

hai zarra zarra mahshar-e-ashob-e-shauq-e-did

ab waqt aa gaya hai ki parda kare koi

gum ho chuki hai qudrat-e-ibda-e-arzu

'beKHud' harim-e-naz to hai kya kare koi