uf ye safar tawil ye chhaalon ka silsila

uf ye safar tavīl ye chhāloñ kā silsila

us par mizāj pūchhne vāloñ kā silsila

ab se rahegā ham meñ mulāqāt bhar kā pyaar

maiñ ḳhatm kar chukā huuñ savāloñ kā silsila

hasrat rahī ki jī leñ zarā ho ke be-ḳhayāl

Thahre kabhī kahīñ to ḳhayāloñ kā silsila

insāñ ko saarī umr phirātā hai dar-ba-dar

do roTiyoñ kā chaar nivāloñ kā silsila

ham hī na apnī qaid se bāhar nikal sake

varna kahāñ nahīñ hai ujāloñ kā silsila

ham ko chamaktī ret pe paanī kā hai gumāñ

aaya kahāñ se ham meñ ġhazāloñ kā silsila

miT jā.eñge vafā ke liye pyaar ke liye

ham TūTne na deñge misāloñ kā silsila

uf ye safar tawil ye chhaalon ka silsila

us par mizaj puchhne walon ka silsila

ab se rahega hum mein mulaqat bhar ka pyar

main KHatm kar chuka hun sawalon ka silsila

hasrat rahi ki ji len zara ho ke be-KHayal

Thahre kabhi kahin to KHayalon ka silsila

insan ko sari umr phiraata hai dar-ba-dar

do roTiyon ka chaar niwalon ka silsila

hum hi na apni qaid se bahar nikal sake

warna kahan nahin hai ujalon ka silsila

hum ko chamakti ret pe pani ka hai guman

aaya kahan se hum mein ghazalon ka silsila

miT jaenge wafa ke liye pyar ke liye

hum TuTne na denge misalon ka silsila