ufuq mein gharq hoti sham ke manzar pe likkha tha

ufuq meñ ġharq hotī shaam ke manzar pe likkhā thā

hamārī pyaas kā qissa har ik sāġhar pe likkhā thā

bazāhir log to shādāb chehre le ke phirte the

udāsī kā fasāna ghar ke bām-o-dar pe likkhā thā

tumhāre shahr meñ har shai mayassar thī hameñ lekin

yahāñ koī nahīñ rahtā ye har ik ghar pe likkhā thā

fasāna rabt-e-bāham kā ajab ḳhatt-e-shikasta meñ

bikharte TūTte alfāz ke paikar pe likkhā thā

jise tum ne uThā kar pheñk Daalā thā samandar meñ

hamāre baḳht kā qissa usī patthar pe likkhā thā

mirī āñkhoñ meñ thiiñ pahnā.iyāñ saat āsmānoñ kī

safar āfāq kā mere hī bāl-o-par pe likkhā thā

uThā kar le ga.e ahbāb ham ko 'maz.harī' jis se

hamārā dard-e-mahrūmī usī bistar pe likkhā thā

ufuq mein gharq hoti sham ke manzar pe likkha tha

hamari pyas ka qissa har ek saghar pe likkha tha

bazahir log to shadab chehre le ke phirte the

udasi ka fasana ghar ke baam-o-dar pe likkha tha

tumhaare shahr mein har shai mayassar thi hamein lekin

yahan koi nahin rahta ye har ek ghar pe likkha tha

fasana rabt-e-baham ka ajab KHatt-e-shikasta mein

bikharte TuTte alfaz ke paikar pe likkha tha

jise tum ne uTha kar phenk Dala tha samandar mein

hamare baKHt ka qissa usi patthar pe likkha tha

meri aankhon mein thin pahnaiyan sat aasmanon ki

safar aafaq ka mere hi baal-o-par pe likkha tha

uTha kar le gae ahbab hum ko 'mazhari' jis se

hamara dard-e-mahrumi usi bistar pe likkha tha