ufuq se jab bhi naya aaftab ubhrega

ufuq se jab bhī nayā āftāb ubhregā

ba-shakl-e-karb ba-rañg-e-azāb ubhregā

har ek mauj samundar meñ chhup ke baiTh ga.ī

us ik yaqīñ pe kabhī to habāb ubhregā

ye gahrī hotī huī ḳhāmushī batātī hai

vo din qarīb hai jab inqalāb ubhregā

nadī vo ret kī hogī jidhar bhī dekhoge

lagegī pyaas to har sū sarāb ubhregā

maiñ apne hāthoñ se ākāsh chhūne vaalā huuñ

tirī jabīñ se bhī ab māhtāb ubhregā

vo ek shaḳhs jo gumnāmiyoñ meñ Duubā thā

kise ḳhabar thī ki le kar kitāb ubhregā

mirā jo azm salāmat rahā to ai 'shahzād'

javār-e-dasht se ik shahr-e-ḳhvāb ubhregā

ufuq se jab bhi naya aaftab ubhrega

ba-shakl-e-karb ba-rang-e-azab ubhrega

har ek mauj samundar mein chhup ke baiTh gai

us ek yaqin pe kabhi to habab ubhrega

ye gahri hoti hui KHamushi batati hai

wo din qarib hai jab inqalab ubhrega

nadi wo ret ki hogi jidhar bhi dekhoge

lagegi pyas to har su sarab ubhrega

main apne hathon se aakash chhune wala hun

teri jabin se bhi ab mahtab ubhrega

wo ek shaKHs jo gumnamiyon mein Duba tha

kise KHabar thi ki le kar kitab ubhrega

mera jo azm salamat raha to ai 'shahzad'

jawar-e-dasht se ek shahr-e-KHwab ubhrega