ujaDti hui taqdir se bandha hua hai

ujāḌtī huī taqdīr se bañdhā huā hai

ye dil hai aur ġham-e-ta.amīr se bañdhā huā hai

vo kyā hai jo mujhe tere qarīb rakhtī hai

daraḳht kaun sī zanjīr se bañdhā huā hai

ḳhudā zarūr karegā mirī taraf-dārī

musavvir apnī tasāvīr se bañdhā huā hai

suḳhan-varī to ghaTātī hai sirf dil kā ġhubār

sukūn sher kī tash.hīr se bañdhā huā hai

maiñ apne aap se kaise alag karūñ us ko

ye naqsh-e-pā hī to rahgīr se bañdhā huā hai

parā.e misre ko murdār māntā huuñ maiñ

mirā shikār mire tiir se bañdhā huā hai

ye hoñT bosa liye bin nahīñ raheñge kabhī

qalam koī bhī ho tahrīr se bañdhā huā hai

bahūr hazrat-e-ġhālib se le ke aa.e haiñ

ḳhayāl miir taqī 'mīr' se bañdhā huā hai

hameñ na niiñd kī qillat na ḳhvāb kī 'hamza'

hamārā mas.ala ta.abīr se bañdhā huā hai

ujaDti hui taqdir se bandha hua hai

ye dil hai aur gham-e-tamir se bandha hua hai

wo kya hai jo mujhe tere qarib rakhti hai

daraKHt kaun si zanjir se bandha hua hai

KHuda zarur karega meri taraf-dari

musawwir apni tasawir se bandha hua hai

suKHan-wari to ghaTati hai sirf dil ka ghubar

sukun sher ki tashhir se bandha hua hai

main apne aap se kaise alag karun us ko

ye naqsh-e-pa hi to rahgir se bandha hua hai

parae misre ko murdar manta hun main

mera shikar mere tir se bandha hua hai

ye honT bosa liye bin nahin rahenge kabhi

qalam koi bhi ho tahrir se bandha hua hai

bahur hazrat-e-ghaalib se le ke aae hain

KHayal mir taqi 'mir' se bandha hua hai

hamein na nind ki qillat na KHwab ki 'hamza'

hamara masala tabir se bandha hua hai