ujalon ke alam-bardar rahiye

ujāloñ ke alam-bardār rahiye

bujhe mash'al to ḳhud tayyār rahiye

hai pinhāñ 'ishq kī tauqīr is meñ

gunahgār-e-salīb-o-dār rahiye

ye suntī kam sunātī hai ziyāda

zarā dīvār se hushiyār rahiye

samajhne meñ hī lag jaa.e zamāna

kuchh aise bhī na pur-asrār rahiye

havāoñ kā safar hai zindagānī

bikharne ke liye tayyār rahiye

magar jab tak bane jaliye sulagiye

jahāñ tak ho sake bedār rahiye

vo aa.egā magar shart-e-vafā hai

sarāpā intizār-e-yār rahiye

ujalon ke alam-bardar rahiye

bujhe mash'al to KHud tayyar rahiye

hai pinhan 'ishq ki tauqir is mein

gunahgar-e-salib-o-dar rahiye

ye sunti kam sunati hai ziyaada

zara diwar se hushiyar rahiye

samajhne mein hi lag jae zamana

kuchh aise bhi na pur-asrar rahiye

hawaon ka safar hai zindagani

bikharne ke liye tayyar rahiye

magar jab tak bane jaliye sulagiye

jahan tak ho sake bedar rahiye

wo aaega magar shart-e-wafa hai

sarapa intizar-e-yar rahiye