uktaya hun is muft ke saman-e-safar se

uktāyā huuñ is muft ke sāmān-e-safar se

ye bojh hī aisā hai utartā nahīñ sar se

ik umr guzārī hai tire shahr meñ lekin

āñkheñ nahīñ kholīñ kabhī zulmāt ke Dar se

is baar bichhaḌ jaanā hai jaise kabhī patte

gir jaa.eñ to milte nahīñ dobāra shajar se

thak-hār ke ruk jā.egī ye vaqt kī gardish

jis roz zamīñ niklegī sūraj ke asar se

sikke jo nikāle mire kashkol se us ne

āñkheñ bhī nikālī haiñ mire kāsa-e-sar se

vo chāñd bhī is chāñd kī taqlīd meñ aksar

kuchh duur Thahar jaatā hai aa kar mire ghar se

'mas.ūd' mirī zaat ko mahfūz kiyā hai

is shor-sharābe ne kisī ḳhvāb ke Dar se

uktaya hun is muft ke saman-e-safar se

ye bojh hi aisa hai utarta nahin sar se

ek umr guzari hai tere shahr mein lekin

aankhen nahin kholin kabhi zulmat ke Dar se

is bar bichhaD jaana hai jaise kabhi patte

gir jaen to milte nahin dobara shajar se

thak-haar ke ruk jaegi ye waqt ki gardish

jis roz zamin niklegi suraj ke asar se

sikke jo nikale mere kashkol se us ne

aankhen bhi nikali hain mere kasa-e-sar se

wo chand bhi is chand ki taqlid mein aksar

kuchh dur Thahar jata hai aa kar mere ghar se

'masud' meri zat ko mahfuz kiya hai

is shor-sharabe ne kisi KHwab ke Dar se