ulajhti haari nigahon ka ham-rikab to tha

ulajhtī haarī nigāhoñ kā ham-rikāb to thā

hazār TuuTā huā thā vo ek ḳhvāb to thā

maiñ un se kahtā thā ik din bichhaḌ hī jā.eñge ham

so sūjhtā hameñ pahle se kuchh hisāb to thā

ab is pe koī na manzil na koī dost sahī

magar ye rāsta hī merā intiḳhāb to thā

yahāñ pe maut sā aa kar hamārā paḌ rahnā

ḳhilāf-e-zindagī hī ek irtikāb to thā

usī kī zau hī se raushan the rāt-din mere

vo daur bhī mirā mahtāb-o-āftāb to thā

kasā huā ajab ik raah par rahā jīvan

ki saḳht sach mirā mujh par ik ehtisāb to thā

kuchal rakhā thā mujhe jis ne mere andar meñ

vo bāhar aan mirī merī taab naab to thā

vafā kā ranj bhī kuchh us meñ thā magar dil kā

do laḳht hotā bhī ik zindagī kā baab to thā

vo jis ne mujh ko nayā aadmī kiyā 'kāvish'

nazar na aaya magar ek inqalāb to thā

ulajhti haari nigahon ka ham-rikab to tha

hazar TuTa hua tha wo ek KHwab to tha

main un se kahta tha ek din bichhaD hi jaenge hum

so sujhta hamein pahle se kuchh hisab to tha

ab is pe koi na manzil na koi dost sahi

magar ye rasta hi mera intiKHab to tha

yahan pe maut sa aa kar hamara paD rahna

KHilaf-e-zindagi hi ek irtikab to tha

usi ki zau hi se raushan the raat-din mere

wo daur bhi mera mahtab-o-aftab to tha

kasa hua ajab ek rah par raha jiwan

ki saKHt sach mera mujh par ek ehtisab to tha

kuchal rakha tha mujhe jis ne mere andar mein

wo bahar aan meri meri tab nab to tha

wafa ka ranj bhi kuchh us mein tha magar dil ka

do laKHt hota bhi ek zindagi ka bab to tha

wo jis ne mujh ko naya aadmi kiya 'kawish'

nazar na aaya magar ek inqalab to tha