ulfat ki agar rudad suno to mera fasana kafi hai

ulfat kī agar rūdād suno to merā fasāna kaafī hai

haañ zikr-e-jafā-e-dost nahīñ bedād-e-zamāna kaafī hai

ham se thā ibārat ḳhanda-e-gul har baat pe aa jaatī thī hañsī

ab azmat-e-girya ham se hai rone ko bahāna kaafī hai

is daur-e-junūñ meñ apnā pata ham is ke sivā kyā samjhā.eñ

ik naqsh-e-qadam sajdoñ ke nishāñ bas itnā Thikāna kaafī hai

pahuñchā ki nahīñ us tak koī is kī to koī tahqīq nahīñ

ham sū-e-harīm-e-dost agar ho jaa.eñ ravāna kaafī hai

duniyā ko bhalā ham kyā deñge ḳhud dast-nigar haiñ ham un ke

kuchh un pe tasadduq karnā ho to ġham kā ḳhazāna kaafī hai

bas ham to mohabbat karte haiñ ham hamd-o-sanā ko kyā samjheñ

sunte haiñ rijhāne ko un ke ulfat kā tarāna kaafī hai

begāna huā har shaḳhs yahāñ ham jis ko 'shifā' apnā samjhe

ab us kā dāman thaam liyā bas vo hī yagāna kaafī hai

ulfat ki agar rudad suno to mera fasana kafi hai

han zikr-e-jafa-e-dost nahin bedad-e-zamana kafi hai

hum se tha ibarat KHanda-e-gul har baat pe aa jati thi hansi

ab azmat-e-girya hum se hai rone ko bahana kafi hai

is daur-e-junun mein apna pata hum is ke siwa kya samjhaen

ek naqsh-e-qadam sajdon ke nishan bas itna Thikana kafi hai

pahuncha ki nahin us tak koi is ki to koi tahqiq nahin

hum su-e-harim-e-dost agar ho jaen rawana kafi hai

duniya ko bhala hum kya denge KHud dast-nigar hain hum un ke

kuchh un pe tasadduq karna ho to gham ka KHazana kafi hai

bas hum to mohabbat karte hain hum hamd-o-sana ko kya samjhen

sunte hain rijhane ko un ke ulfat ka tarana kafi hai

begana hua har shaKHs yahan hum jis ko 'shifa' apna samjhe

ab us ka daman tham liya bas wo hi yagana kafi hai