ulfat ki choT aah-o-fughan siskiyan tamam

ulfat kī choT āh-o-fuġhāñ siskiyāñ tamām

vo mere naam kar ga.e bechainiyāñ tamām

zehn-o-jigar meñ jab bhī machalte haiñ zalzale

tang aa ke chīḳh paḌtīñ haiñ ḳhāmoshiyāñ tamām

rakkheñge kab talak mujhe yūñhī qatār meñ

sun lījiye huzūr mirī arziyāñ tamām

nafrat ko apne qalb se bāhar nikāliye

dariyā meñ pheñk ā.īye ye barchhiyāñ tamām

phūloñ meñ terā rang havāoñ meñ hai mahak

jalvoñ meñ tere jazb haiñ ra.anā.iyāñ tamām

shāyad abhī bhī aap ko fursat nahīñ milī

rakkhī haiñ tāqche pe merī chiTThiyāñ tamām

maiñ ne jo ik shajar kī hifāzat sañbhāl lī

mere hī samt ho ga.iiñ phir āñdhiyāñ tamām

ik ḳhvāb dekhtā huuñ maiñ 'āzād' roz-o-shab

mahfūz hai vatan kī mire beTiyāñ tamām

ulfat ki choT aah-o-fughan siskiyan tamam

wo mere nam kar gae bechainiyan tamam

zehn-o-jigar mein jab bhi machalte hain zalzale

tang aa ke chiKH paDtin hain KHamoshiyan tamam

rakkhenge kab talak mujhe yunhi qatar mein

sun lijiye huzur meri arziyan tamam

nafrat ko apne qalb se bahar nikaliye

dariya mein phenk aaiye ye barchhiyan tamam

phulon mein tera rang hawaon mein hai mahak

jalwon mein tere jazb hain ranaiyan tamam

shayad abhi bhi aap ko fursat nahin mili

rakkhi hain taqche pe meri chiTThiyan tamam

main ne jo ek shajar ki hifazat sanbhaal li

mere hi samt ho gain phir aandhiyan tamam

ek KHwab dekhta hun main 'azad' roz-o-shab

mahfuz hai watan ki mere beTiyan tamam