ulfat mein ayan soz-e-butan ho nahin sakta

ulfat meñ ayaañ soz-e-butāñ ho nahīñ saktā

ye aag hai aisī ki dhuāñ ho nahīñ saktā

kyā pārā-e-dil koī zabāñ ho nahīñ saktā

kyā uḌ ke lahū rañg-e-fuġhāñ ho nahīñ saktā

o jalva-gah-e-tūr ke khul-khelne vaale

kyā dil koī ḳhalvat kā makāñ ho nahīñ saktā

mujh ko hai lab-e-jām-e-shikasta bhī mah-e-īd

saaqī ye hilāl-e-ramazāñ ho nahīñ saktā

joban se hai maskī huī mahram kā ishāra

ye din vo haiñ koī nigarāñ ho nahīñ saktā

jaane meñ vahāñ āñdhī hai ai āh-e-rasā tū

kyā ashk-e-ravāñ sail-e-ravāñ ho nahīñ saktā

din aur jagah aur ho ai dāvar-e-mahshar

insāf hasīnoñ kā yahāñ ho nahīñ saktā

dīvāna-e-lailā ko na lailā se rahā kaam

kuchh aur balā hai ḳhafaqāñ ho nahīñ saktā

jo daam uTheñ husn-e-javānī ke vo kam haiñ

saudā ye kisī tarah garāñ ho nahīñ saktā

but-ḳhāne banā karte haiñ kis tarah masājid

jab naġhma-e-nāqūs azaañ ho nahīñ saktā

dīvānoñ kā andāz uḌāte haiñ anādil

dīvāne meñ ye rañg-e-fuġhāñ ho nahīñ saktā

ye jaan ko merī hai azaab āTh-pahr kā

dil sā bhī koī āfat-e-jāñ ho nahīñ saktā

haiñ pīrī-o-tiflī-o-javānī ke maze aur

duniyā sā koī aur jahāñ ho nahīñ saktā

badle hue haiñ charḳh ke sab chāñd-sitāre

vo vasl kī rāteñ vo samāñ ho nahīñ saktā

banñe ko 'riyāz' aap baneñ kohkan-o-qais

haiñ sāḳhta bāteñ ḳhafaqāñ ho nahīñ saktā

ulfat mein ayan soz-e-butan ho nahin sakta

ye aag hai aisi ki dhuan ho nahin sakta

kya para-e-dil koi zaban ho nahin sakta

kya uD ke lahu rang-e-fughan ho nahin sakta

o jalwa-gah-e-tur ke khul-khelne wale

kya dil koi KHalwat ka makan ho nahin sakta

mujh ko hai lab-e-jam-e-shikasta bhi mah-e-id

saqi ye hilal-e-ramazan ho nahin sakta

joban se hai maski hui mahram ka ishaara

ye din wo hain koi nigaran ho nahin sakta

jaane mein wahan aandhi hai ai aah-e-rasa tu

kya ashk-e-rawan sail-e-rawan ho nahin sakta

din aur jagah aur ho ai dawar-e-mahshar

insaf hasinon ka yahan ho nahin sakta

diwana-e-laila ko na laila se raha kaam

kuchh aur bala hai KHafaqan ho nahin sakta

jo dam uThen husn-e-jawani ke wo kam hain

sauda ye kisi tarah garan ho nahin sakta

but-KHane bana karte hain kis tarah masajid

jab naghma-e-naqus azan ho nahin sakta

diwanon ka andaz uDate hain anadil

diwane mein ye rang-e-fughan ho nahin sakta

ye jaan ko meri hai azab aaTh-pahr ka

dil sa bhi koi aafat-e-jaan ho nahin sakta

hain piri-o-tifli-o-jawani ke maze aur

duniya sa koi aur jahan ho nahin sakta

badle hue hain charKH ke sab chand-sitare

wo wasl ki raaten wo saman ho nahin sakta

banne ko 'riyaz' aap banen kohkan-o-qais

hain saKHta baaten KHafaqan ho nahin sakta