uljhanon par uljhanen KHaljaan hai KHaljaan par

uljhanoñ par uljhaneñ ḳhaljān hai ḳhaljān par

aah kitnī āfateñ haiñ hazrat-e-insān par

kaam phir kartī nahīñ hai mantiq-o-tadbīr kuchh

parda jab paḌ jaa.e terī aql kī shiryān par

dil adāvat se bhare haiñ par zabāñ shīrīñ-suḳhan

is liye kuḌhtā hai dil iḳhlās ke fuqdān par

dhuul saarī umr phir vo chāTtā phirtā rahe

mo'tariz ho jaa.e jab insān hī vijdān par

ġhasb kar jaate haiñ aksar haq kisī ma.asūm kā

log miTTī Dālte haiñ is tarah īmān par

haal meñ rah kar bhī rishta rakhte haiñ maazī ke saath

rashk āshiq is qadar karte haiñ har nuqsān par

kyoñ basārat kī zamīñ banjar kī banjar rah ga.ī

dukh hai terī zaat par tuf hai tirī pahchān par

parbatoñ par bhī agar rakh do to jhuk jā.eñge vo

aise aise dard bhī jhele haiñ ham ne jaan par

aaj 'ushba' log merī baat kyoñ sunte nahīñ

ḳhud ko kosūñ yā ki ro.uuñ aise kaj-az.hān par

uljhanon par uljhanen KHaljaan hai KHaljaan par

aah kitni aafaten hain hazrat-e-insan par

kaam phir karti nahin hai mantiq-o-tadbir kuchh

parda jab paD jae teri aql ki shiryan par

dil adawat se bhare hain par zaban shirin-suKHan

is liye kuDhta hai dil iKHlas ke fuqdan par

dhul sari umr phir wo chaTta phirta rahe

mo'tariz ho jae jab insan hi wijdan par

ghasb kar jate hain aksar haq kisi masum ka

log miTTi Dalte hain is tarah iman par

haal mein rah kar bhi rishta rakhte hain mazi ke sath

rashk aashiq is qadar karte hain har nuqsan par

kyon basarat ki zamin banjar ki banjar rah gai

dukh hai teri zat par tuf hai teri pahchan par

parbaton par bhi agar rakh do to jhuk jaenge wo

aise aise dard bhi jhele hain hum ne jaan par

aaj 'ushba' log meri baat kyon sunte nahin

KHud ko kosun ya ki roun aise kaj-azhan par