uljhe hue din khoi hui raat na hoti

uljhe hue din khoī huī raat na hotī

ai kaash mirī tum se mulāqāt na hotī

ādāb-e-vafā kā jo maiñ pāband na hotā

vallāh ki ye sūrat-e-hālāt na hotī

tum ġham kā lab-o-lahja samajh hī nahīñ paa.e

varna kabhī is darja baḌhī baat na hotī

dil khol ke tāroñ se meñ kahtā thā kahānī

hotī baḌī rusvā.ī agar raat na hotī

sab kuchh maiñ samajh baiThā tirī yaad ko varna

ujḌī huī firdaus-e-ḳhayālāt na hotī

dar-asl ḳhatā hai ye mire zauq-e-nazar kī

varna tumheñ taklīf-e-hijābāt na hotī

tujh se ġham-e-daurāñ hī bhalā ai ġham-e-jānāñ

is tarah to barbādī-e-jazbāt na hotī

kam-zarf bhī aa nikle haiñ maiḳhāne kī jānib

is se to ye achchhā thā ki barsāt na hotī

dil ġham se hai bezār magar ye jo na hotā

'jauhar' kabhī takmīl-e-kamālat na hotī

uljhe hue din khoi hui raat na hoti

ai kash meri tum se mulaqat na hoti

aadab-e-wafa ka jo main paband na hota

wallah ki ye surat-e-haalat na hoti

tum gham ka lab-o-lahja samajh hi nahin pae

warna kabhi is darja baDhi baat na hoti

dil khol ke taron se mein kahta tha kahani

hoti baDi ruswai agar raat na hoti

sab kuchh main samajh baiTha teri yaad ko warna

ujDi hui firdaus-e-KHayalat na hoti

dar-asl KHata hai ye mere zauq-e-nazar ki

warna tumhein taklif-e-hijabaat na hoti

tujh se gham-e-dauran hi bhala ai gham-e-jaanan

is tarah to barbaadi-e-jazbaat na hoti

kam-zarf bhi aa nikle hain maiKHane ki jaanib

is se to ye achchha tha ki barsat na hoti

dil gham se hai bezar magar ye jo na hota

'jauhar' kabhi takmil-e-kamalat na hoti