uljhi hui lakiron ka ye jal dekh kar

uljhī huī lakīroñ kā ye jaal dekh kar

'āmil bhī ro paḌā hai mirī faal dekh kar

aisī lakīr jis pe tirā naam thā likhā

vo miT ga.ī hai vaqt kī ye chaal dekh kar

lālach ke muñh meñ hirs kā paanī sā aa gayā

ġhurbat kī bastiyoñ meñ paḌā kaal dekh kar

hākim kī bāchheñ khil ga.iiñ āñkhoñ ke saath saath

qarzoñ kī mad meñ aayā huā maal dekh kar

āñkhoñ kī khiḌkiyoñ se takā chāñd ko bahut

ham ne manā.ī 'iid tirā gaal dekh kar

hoñToñ kī siskiyoñ ne chhuā hoñT ko magar

sāñsoñ kī chīḳh dab ga.ī vo ḳhaal dekh kar

din ne tire vujūd se raushan kiyā jahāñ

utrī na shab meñ raat tire baal dekh kar

din bhar pukārtā huuñ tirā naam letā huuñ

aa.egā tujh ko rahm mirā haal dekh kar

uljhi hui lakiron ka ye jal dekh kar

'amil bhi ro paDa hai meri fal dekh kar

aisi lakir jis pe tera nam tha likha

wo miT gai hai waqt ki ye chaal dekh kar

lalach ke munh mein hirs ka pani sa aa gaya

ghurbat ki bastiyon mein paDa kal dekh kar

hakim ki bachhen khil gain aankhon ke sath sath

qarzon ki mad mein aaya hua mal dekh kar

aankhon ki khiDkiyon se taka chand ko bahut

hum ne manai 'id tera gal dekh kar

honTon ki siskiyon ne chhua honT ko magar

sanson ki chiKH dab gai wo KHal dekh kar

din ne tere wujud se raushan kiya jahan

utri na shab mein raat tere baal dekh kar

din bhar pukarta hun tera nam leta hun

aaega tujh ko rahm mera haal dekh kar