uljhi thi zulf usne sanwara sanwar gai

uljhī thī zulf us ne sañvārā sañvar ga.ī

shāne ko kyā ḳhabar ye balā kis ke sar ga.ī

ā.īne bhī banā.e to dekhā na apnā muñh

ab tak na ḳhadd-o-ḳhāl pe apne nazar ga.ī

yuuñ to ravāq-e-daulat-o-dīñ bhī the sāya-dār

lekin thakan ġharīb kī sū-e-shajar ga.ī

ahl-e-nazar na mujh pe hañseñ merī ye nazar

kuchh to barūn-e-halqa-e-hadd-e-nazar ga.ī

raste meñ kyā dharā thā ki ruktī kahīñ nigāh

dekhā tumheñ to umr-e-gurezāñ Thahar ga.ī

ūñchī huī fuġhāñ to ga.ī āsmāñ ke paar

utrā jo arsh se to diloñ meñ utar ga.ī

manzil to apnī hadd-e-nazar hī pe thī 'jamīl'

pahuñche vahāñ to aur kuchh aage nazar ga.ī

uljhi thi zulf us ne sanwara sanwar gai

shane ko kya KHabar ye bala kis ke sar gai

aaine bhi banae to dekha na apna munh

ab tak na KHadd-o-KHal pe apne nazar gai

yun to rawaq-e-daulat-o-din bhi the saya-dar

lekin thakan gharib ki su-e-shajar gai

ahl-e-nazar na mujh pe hansen meri ye nazar

kuchh to barun-e-halqa-e-hadd-e-nazar gai

raste mein kya dhara tha ki rukti kahin nigah

dekha tumhein to umr-e-gurezan Thahar gai

unchi hui fughan to gai aasman ke par

utra jo arsh se to dilon mein utar gai

manzil to apni hadd-e-nazar hi pe thi 'jamil'

pahunche wahan to aur kuchh aage nazar gai