ulul-azmi na bebaki na chanchal zindagani hai

ulul-'azmī na bebākī na chanchal zindagānī hai

tumhīñ socho ki ye koī javānī meñ javānī hai

chalāo apnī marzī par palaT do aur badal Daalo

zamāne kī vo gardish hai ki daur-e-āsmānī hai

agar hai josh sar meñ aur dil meñ jazba-e-sādiq

to phir nār-e-jahannam bhī tumhāre aage paanī hai

tabāhī par chaman kī nauha-ḳhvānī kis liye bulbul

tū jī mat chhoḌ fasl-e-gul phir aanī hai phir aanī hai

jo haiñ āzād dil ke un ko qaid aur ban barābar haiñ

ravāñ pābandī-e-sāhil pe bhī dariyā kā paanī hai

vatan ke ġham se dil meñ ho kasak aur ḳhuun āñkhoñ meñ

hamāre haq meñ kyā kam ye naved-e-shādmānī hai

zarūrat hai vatan ko tere īsār-e-mukammal kī

agar jazba tirā ḳhālis nirā hindostānī hai

sivā haq ke kisī ke aage vo jhukte nahīñ 'kaifī'

ye mardān-e-ḳhudā kī shaan ye un kī nishānī hai

ulul-'azmi na bebaki na chanchal zindagani hai

tumhin socho ki ye koi jawani mein jawani hai

chalao apni marzi par palaT do aur badal Dalo

zamane ki wo gardish hai ki daur-e-asmani hai

agar hai josh sar mein aur dil mein jazba-e-sadiq

to phir nar-e-jahannam bhi tumhaare aage pani hai

tabahi par chaman ki nauha-KHwani kis liye bulbul

tu ji mat chhoD fasl-e-gul phir aani hai phir aani hai

jo hain aazad dil ke un ko qaid aur ban barabar hain

rawan pabandi-e-sahil pe bhi dariya ka pani hai

watan ke gham se dil mein ho kasak aur KHun aankhon mein

hamare haq mein kya kam ye nawed-e-shadmani hai

zarurat hai watan ko tere isar-e-mukammal ki

agar jazba tera KHalis nira hindostani hai

siwa haq ke kisi ke aage wo jhukte nahin 'kaifi'

ye mardan-e-KHuda ki shan ye un ki nishani hai