umDe hue dilon ke wo jazbaat le gae

umDe hue diloñ ke vo jazbāt le ga.e

bādal uThe to saath meñ barsāt le ga.e

sūraj ko Dūbtā huā maiñ dekhtā rahā

dil kā sukūn vaqt ke hālāt le ga.e

aa.e the bāñTne ke liye zindagī ke ġham

dāman meñ apne ashkoñ kī ḳhairāt le ga.e

tanhā.ī apnā husn-e-muqaddar banī rahī

sahrā meñ ḳhvāhishāt kī bārāt le ga.e

andhe kueñ ke ḳhol nazar aa.e har taraf

mujh ko kahāñ kahāñ ye ḳhayālāt le ga.e

milne kī vaz.a-dārī zamāne meñ ab kahāñ

muḳhlis jo the vo rang-e-mulāqāt le ga.e

ubhre the un ke dil meñ savālāt jo 'ra.īs'

āñkhoñ se merī sab ke javābāt le ga.e

umDe hue dilon ke wo jazbaat le gae

baadal uThe to sath mein barsat le gae

suraj ko Dubta hua main dekhta raha

dil ka sukun waqt ke haalat le gae

aae the banTne ke liye zindagi ke gham

daman mein apne ashkon ki KHairaat le gae

tanhai apna husn-e-muqaddar bani rahi

sahra mein KHwahishat ki baraat le gae

andhe kuen ke KHol nazar aae har taraf

mujh ko kahan kahan ye KHayalat le gae

milne ki waza-dari zamane mein ab kahan

muKHlis jo the wo rang-e-mulaqat le gae

ubhre the un ke dil mein sawalat jo 'rais'

aankhon se meri sab ke jawabaat le gae