umid koi nahin aasra bhi koi nahin

umiid koī nahīñ aasrā bhī koī nahīñ

davā bhī koī nahīñ ab duā bhī koī nahīñ

kuchh itne ho ga.e bezār apne haal se log

ki apne haal pe ab sochtā bhī koī nahīñ

batā.e kaun vahāñ kyā guzar ga.ī kis par

ki is dayār se aayā gayā bhī koī nahīñ

hisār-e-jāñ ke vo us paar hī to rahtā hai

faqat hai shart-e-safar fāslā bhī koī nahīñ

guzar huā jo kabhī us se mil liye varna

savāl us se kujā mudda.ā bhī koī nahīñ

mire suḳhan ne mujhe rū-shanās sab se kiyā

vagarna chehre se pahchāntā bhī koī nahīñ

hamīñ ne ḳhud pe kiye band saare dar 'mohsin'

nikalnā chāheñ to ab rāstā bhī koī nahīñ

umid koi nahin aasra bhi koi nahin

dawa bhi koi nahin ab dua bhi koi nahin

kuchh itne ho gae bezar apne haal se log

ki apne haal pe ab sochta bhi koi nahin

batae kaun wahan kya guzar gai kis par

ki is dayar se aaya gaya bhi koi nahin

hisar-e-jaan ke wo us par hi to rahta hai

faqat hai shart-e-safar fasla bhi koi nahin

guzar hua jo kabhi us se mil liye warna

sawal us se kuja muddaa bhi koi nahin

mere suKHan ne mujhe ru-shanas sab se kiya

wagarna chehre se pahchanta bhi koi nahin

hamin ne KHud pe kiye band sare dar 'mohsin'

nikalna chahen to ab rasta bhi koi nahin