umid-o-bim ke aalam mein dil dahalta hai

umīd-o-bīm ke 'ālam meñ dil dahaltā hai

vo aate aate ka.ī rāste badaltā hai

abhī to shaam hai tanqīd kar na rindoñ par

sunā hai raat ga.e mai-kada sañbhaltā hai

na koī ḳhauf na andesha aur na raḳht-e-safar

ye kaun hai jo mire saath saath chaltā hai

hamāre vāste jis jā pe hadd-e-fāsil hai

vahīñ se ek nayā rāsta nikaltā hai

'ajīb chiiz hai ye karb-e-ḳhud-kalāmī bhī

jo baat kiije to ik silsila nikaltā hai

na jaane kitne sar-e-pur-ġhurūr kaTte haiñ

'ajīb shaḳhs hai talvār ban ke chaltā hai

'habāb' shikva bajā laao naqd-e-jāñ ke tufail

tumhāre naam kā sikka yahāñ bhī chaltā hai

umid-o-bim ke 'alam mein dil dahalta hai

wo aate aate kai raste badalta hai

abhi to sham hai tanqid kar na rindon par

suna hai raat gae mai-kada sanbhalta hai

na koi KHauf na andesha aur na raKHt-e-safar

ye kaun hai jo mere sath sath chalta hai

hamare waste jis ja pe hadd-e-fasil hai

wahin se ek naya rasta nikalta hai

'ajib chiz hai ye karb-e-KHud-kalami bhi

jo baat kije to ek silsila nikalta hai

na jaane kitne sar-e-pur-ghurur kaTte hain

'ajib shaKHs hai talwar ban ke chalta hai

'habab' shikwa baja lao naqd-e-jaan ke tufail

tumhaare nam ka sikka yahan bhi chalta hai