ummid-e-shauq ho ya wada-e-rahat-fiza koi

ummīd-e-shauq ho yā vāda-e-rāhat-fizā koī

marīz-e-ishq ko achchhā nahīñ kartī davā koī

bharī duniyā meñ apne bhī haiñ begāne bhī haiñ lekin

nahīñ hamdard ab merā tire ġham ke sivā koī

purānā ho gayā hai zikr-e-tauba chhoḌiye saaqī

purānī ho to lā koī rakhā koī pilā koī

mujhe ye arz karnī hai tumhārī be-niyāzī se

tumhārī aarzū ke ba.ad kaisā mudda.ā koī

ye apnī apnī aadat hai ye apnī apnī fitrat hai

koī hai banda-e-mehr-o-vafā to be-vafā koī

zamāne kī nigāhoñ meñ gunahgār-e-vafā ham haiñ

na jaane kyuuñ nahīñ hotā hamārā faisla koī

ye dil aTke kā saudā hai ye dil aa.egā qissa hai

mohabbat kī nigāhoñ meñ nahīñ achchhā burā koī

samā kar dil meñ pardā hai nigāh-e-shauq se ya.anī

ḳhud apne aap se chhuptā hai ab kāfir-adā koī

'rishī' ham har kisī se haal dil kā kah nahīñ sakte

baḌī mushkil se miltā hai kahīñ dard-āshnā koī

ummid-e-shauq ho ya wada-e-rahat-fiza koi

mariz-e-ishq ko achchha nahin karti dawa koi

bhari duniya mein apne bhi hain begane bhi hain lekin

nahin hamdard ab mera tere gham ke siwa koi

purana ho gaya hai zikr-e-tauba chhoDiye saqi

purani ho to la koi rakha koi pila koi

mujhe ye arz karni hai tumhaari be-niyazi se

tumhaari aarzu ke baad kaisa muddaa koi

ye apni apni aadat hai ye apni apni fitrat hai

koi hai banda-e-mehr-o-wafa to be-wafa koi

zamane ki nigahon mein gunahgar-e-wafa hum hain

na jaane kyun nahin hota hamara faisla koi

ye dil aTke ka sauda hai ye dil aaega qissa hai

mohabbat ki nigahon mein nahin achchha bura koi

sama kar dil mein parda hai nigah-e-shauq se yani

KHud apne aap se chhupta hai ab kafir-ada koi

'rishi' hum har kisi se haal dil ka kah nahin sakte

baDi mushkil se milta hai kahin dard-ashna koi