ummid ke lamhe kisi jaanib bhi nahin the

ummīd ke lamhe kisī jānib bhī nahīñ the

gahrī thī siyah-rāt kavākib bhī nahīñ thī

ik karb thā khiltī huī kaliyoñ ke badan meñ

bāloñ ke liye phuul munāsib bhī nahīñ the

tanhā.ī ke mausam meñ akele hī the ghar meñ

ā.īne magar ham se muḳhātib bhī nahīñ the

ma.atūb hue shah to ġhulāmoñ kī ban aa.ī

hākim hue haiñ vo jo musāhib bhī nahīñ the

ik chīḳh ḳhamoshī meñ dabī sehr-zada thī

go ā.inoñ se aks muḳhātib bhī nahīñ the

har dast-e-tajassus meñ thī chhūne kī havas tez

maujūd kī tasḳhīr meñ qālib bhī nahīñ the

ab kaaT rahe haiñ usī be-rang safar ko

ham apnī hī taqdīr ke kātib bhī nahīñ the

kaTte rahe dīvāroñ ke saa.e se 'nazar' ham

is rāhat-e-be-rang ke tālib bhī nahīñ the

ummid ke lamhe kisi jaanib bhi nahin the

gahri thi siyah-raat kawakib bhi nahin thi

ek karb tha khilti hui kaliyon ke badan mein

baalon ke liye phul munasib bhi nahin the

tanhai ke mausam mein akele hi the ghar mein

aaine magar hum se muKHatib bhi nahin the

matub hue shah to ghulamon ki ban aai

hakim hue hain wo jo musahib bhi nahin the

ek chiKH KHamoshi mein dabi sehr-zada thi

go aainon se aks muKHatib bhi nahin the

har dast-e-tajassus mein thi chhune ki hawas tez

maujud ki tasKHir mein qalib bhi nahin the

ab kaT rahe hain usi be-rang safar ko

hum apni hi taqdir ke katib bhi nahin the

kaTte rahe diwaron ke sae se 'nazar' hum

is rahat-e-be-rang ke talib bhi nahin the