ummid ke sahil pe Thahar kyon nahin jata

ummīd ke sāhil pe Thahar kyoñ nahīñ jaatā

dariyā mirī āñkhoñ kā utar kyoñ nahīñ jaatā

zīnat kī koī chiiz salāmat nahīñ maulā

naqsha ye mire ghar kā sañvar kyoñ nahīñ jaatā

muddat se kaḌī dhuup meñ jo garm-e-safar hai

vo dasht-e-tamannā se udhar kyoñ nahīñ jaatā

vo kab mire dukh-dard ko mahsūs karegā

kuuze meñ samundar ye utar kyoñ nahīñ jaatā

hāthoñ kī lakīroñ ne sitāre se kahā hai

āñgan meñ mire chāñd utar kyoñ nahīñ jaatā

kab tak maiñ sañbhālā karūñ ḳhākistar-e-dil ko

ḳhushbū kī tarah maiñ bhī bikhar kyoñ nahīñ jaatā

kis kis kī ināyāt kā ehsās sañbhāle

ye bojh mire sar se utar kyoñ nahīñ jaatā

tahzīb ke a.amāl ke ā.īne bahut haiñ

chehroñ kā magar rang nikhar kyoñ nahīñ jaatā

ummid ke sahil pe Thahar kyon nahin jata

dariya meri aankhon ka utar kyon nahin jata

zinat ki koi chiz salamat nahin maula

naqsha ye mere ghar ka sanwar kyon nahin jata

muddat se kaDi dhup mein jo garm-e-safar hai

wo dasht-e-tamanna se udhar kyon nahin jata

wo kab mere dukh-dard ko mahsus karega

kuze mein samundar ye utar kyon nahin jata

hathon ki lakiron ne sitare se kaha hai

aangan mein mere chand utar kyon nahin jata

kab tak main sanbhaala karun KHakistar-e-dil ko

KHushbu ki tarah main bhi bikhar kyon nahin jata

kis kis ki inayat ka ehsas sanbhaale

ye bojh mere sar se utar kyon nahin jata

tahzib ke aamal ke aaine bahut hain

chehron ka magar rang nikhar kyon nahin jata