umr baqi rah-e-jaanan mein basar hone ko hai

umr baaqī rāh-e-jānāñ meñ basar hone ko hai

aaj apnī saḳht-jānī sañg-e-dar hone ko hai

ālam-e-pīrī meñ hai dāġh-e-javānī kā faroġh

ye charāġh-e-shām ḳhurshīd-e-sahar hone ko hai

āmad-e-pīrī meñ ġhaflat hai javānī kī vahī

niiñd se āñkheñ nahīñ khultīñ sahar hone ko hai

ham ko rusvā kar ke rusvā.ī se bachnā hai muhāl

tū bhī tash.hīr ai nigāh-e-fitna-gar hone ko hai

dāġh-e-isyāñ ik taraf ashk-e-nadāmat ik taraf

nuuh ke tūfān se jañg-e-sharar hone ko hai

kaun sī dhun ho ga.ī dekheñ dil-e-sad-pāsh ko

ye shikasta saaz kis naġhme kā ghar hone ko hai

ḳhalvat o kasrat meñ mujh se pūchhtī hai bekasī

us taraf ho jā.ūñ maiñ bhī tū jidhar hone ko hai

yūsuf-e-mazmūñ ko laa.e fikr-e-kuhna ai 'munīr'

ye zuleḳhā naujavāñ bār-e-digar hone ko hai

umr baqi rah-e-jaanan mein basar hone ko hai

aaj apni saKHt-jaani sang-e-dar hone ko hai

aalam-e-piri mein hai dagh-e-jawani ka farogh

ye charagh-e-sham KHurshid-e-sahar hone ko hai

aamad-e-piri mein ghaflat hai jawani ki wahi

nind se aankhen nahin khultin sahar hone ko hai

hum ko ruswa kar ke ruswai se bachna hai muhaal

tu bhi tashhir ai nigah-e-fitna-gar hone ko hai

dagh-e-isyan ek taraf ashk-e-nadamat ek taraf

nuh ke tufan se jang-e-sharar hone ko hai

kaun si dhun ho gai dekhen dil-e-sad-pash ko

ye shikasta saz kis naghme ka ghar hone ko hai

KHalwat o kasrat mein mujh se puchhti hai bekasi

us taraf ho jaun main bhi tu jidhar hone ko hai

yusuf-e-mazmun ko lae fikr-e-kuhna ai 'munir'

ye zuleKHa naujawan bar-e-digar hone ko hai