umr bhar bojh uThaya to nahin ja sakta

umr bhar bojh uThāyā to nahīñ jā saktā

har ta.alluq ko nibhāyā to nahīñ jā saktā

aap is baar bhī dīvār meñ chunvā deñ mujhe

ab ke bhī sar ye jhukāyā to nahīñ jā saktā

roz marne kā hunar jis ne sikhāyā hai mujhe

us kā ehsān bhulāyā to nahīñ jā saktā

chashm-e-bīnā hai magar aql se nā-bīnā haiñ

aa.ina un ko dikhāyā to nahīñ jā saktā

tum ne ik umr mire dil pe hukūmat kī hai

tum ko pal bhar meñ bhulāyā to nahīñ jā saktā

jin ko alfāz se Dasne kā hunar aatā hai

haath ab un se milāyā to nahīñ jā saktā

jis qadar sañg-zanī chāhiye kar leñ mujh par

sañg-zādī ko rulāyā to nahīñ jā saktā

hoñ makīñ jin meñ ka.ī saal se zinda lāsheñ

un makānoñ ko sajāyā to nahīñ jā saktā

jis kī ḳhāmoshī meñ aaseb sukūñ karte hoñ

aisā vīrāna basāyā to nahīñ jā saktā

tū but-e-ishq nahīñ tū to ḳhudā hai merā

ab tujhe haath lagāyā to nahīñ jā saktā

umr bhar bojh uThaya to nahin ja sakta

har talluq ko nibhaya to nahin ja sakta

aap is bar bhi diwar mein chunwa den mujhe

ab ke bhi sar ye jhukaya to nahin ja sakta

roz marne ka hunar jis ne sikhaya hai mujhe

us ka ehsan bhulaya to nahin ja sakta

chashm-e-bina hai magar aql se na-bina hain

aaina un ko dikhaya to nahin ja sakta

tum ne ek umr mere dil pe hukumat ki hai

tum ko pal bhar mein bhulaya to nahin ja sakta

jin ko alfaz se Dasne ka hunar aata hai

hath ab un se milaya to nahin ja sakta

jis qadar sang-zani chahiye kar len mujh par

sang-zadi ko rulaya to nahin ja sakta

hon makin jin mein kai sal se zinda lashen

un makanon ko sajaya to nahin ja sakta

jis ki KHamoshi mein aaseb sukun karte hon

aisa virana basaya to nahin ja sakta

tu but-e-ishq nahin tu to KHuda hai mera

ab tujhe hath lagaya to nahin ja sakta