umr bhar isko rahi ek sargirani aur bas

umr bhar is ko rahī ik sargirānī aur bas

vo to kahiye thī hamārī saḳht-jānī aur bas

ek musht-e-ḳhāk bil-āḳhir jo ḳhākistar huī

so ma.āl-e-zindagī hai rā.egānī aur bas

ik dayār-e-be-amāñ kī kaj-adā.ī dam-ba-dam

ik shab-e-hijrāñ kī paiham nauha-ḳhvānī aur bas

māh-o-anjum husn-e-parvāz-e-taḳhayyul ke liye

rahguzar kī dhuul manzil kī nishānī aur bas

āshiqī ke baab meñ dāman-darīda hī rahe

ik nazar bas ik tabassum kul kahānī aur bas

raqs meñ haiñ vahshateñ qarya-ba-qarya kū-ba-kū

ye junūn-e-ishq kī resha-davānī aur bas

thā shaikast-e-shauq kā unvān ishq-e-avvalīñ

pesh-e-pā uftāda merā ishq-e-sānī aur bas

zindagī kā isti.āra hai dil-e-shorīda-sar

hai ragoñ meñ ishq kī ātish-fishānī aur bas

dil sahīfa naqsh se ārāsta us ke rahā

dil sahīfe meñ likhī is kī kahānī aur bas

dard kā darmāñ suḳhan-hā-e-shagufta bhī nahīñ

be-asar hai sab tirī jādū-bayānī aur bas

hai shab-e-hijrāñ tilism-e-tīrgī 'anjum' darāz

chashm-e-girya kī hai ḳhūnāba-fishānī aur bas

umr bhar is ko rahi ek sargirani aur bas

wo to kahiye thi hamari saKHt-jaani aur bas

ek musht-e-KHak bil-aKHir jo KHakistar hui

so maal-e-zindagi hai raegani aur bas

ek dayar-e-be-aman ki kaj-adai dam-ba-dam

ek shab-e-hijran ki paiham nauha-KHwani aur bas

mah-o-anjum husn-e-parwaz-e-taKHayyul ke liye

rahguzar ki dhul manzil ki nishani aur bas

aashiqi ke bab mein daman-darida hi rahe

ek nazar bas ek tabassum kul kahani aur bas

raqs mein hain wahshaten qarya-ba-qarya ku-ba-ku

ye junun-e-ishq ki resha-dawani aur bas

tha shaikast-e-shauq ka unwan ishq-e-awwalin

pesh-e-pa uftada mera ishq-e-sani aur bas

zindagi ka istiara hai dil-e-shorida-sar

hai ragon mein ishq ki aatish-fishani aur bas

dil sahifa naqsh se aarasta us ke raha

dil sahife mein likhi is ki kahani aur bas

dard ka darman suKHan-ha-e-shagufta bhi nahin

be-asar hai sab teri jadu-bayani aur bas

hai shab-e-hijran tilism-e-tirgi 'anjum' daraaz

chashm-e-girya ki hai KHunaba-fishani aur bas