umr-bhar ishq ke aazar ne sone na diya

umr-bhar ishq ke āzār ne sone na diyā

haa.e haa.e dil-e-bīmār ne sone na diyā

ḳhvāb meñ shakl dikhātā vo muqarrar mujh ko

shauq ke tāla-e-bedār ne sone na diyā

aish kī shab bhī mire baḳht ko aa jaatī niiñd

us kī pāzeb kī jhankār ne sone na diyā

mere marqad pe kahā kis ne qayāmat hai qarīb

yaad aa kar tirī raftār ne sone na diyā

rat-jage hote rahe haiñ ki baḌhe ġham kī umr

ek shab dard-e-dil-e-zār ne sone na diyā

maiñ ne sone na diyā shaam se us ko shab-e-vasl

sub.h tak zid se mujhe yaar ne sone na diyā

nīsh-e-ġham ne rag-e-mizhgāñ se nikālā ye lahū

mujh ko rātoñ mire ġham-ḳhvār ne sone na diyā

mai-kasho surḳh haiñ āñkheñ jo tumhārī shāyad

shab tumheñ sāqī-e-sarshār ne sone na diyā

ḳhauf thā us ko 'shahīdī' tirī bad-mastī kā

shab jo ham-bazmoñ ko ayyār ne sone na diyā

umr-bhar ishq ke aazar ne sone na diya

hae hae dil-e-bimar ne sone na diya

KHwab mein shakl dikhata wo muqarrar mujh ko

shauq ke tala-e-bedar ne sone na diya

aish ki shab bhi mere baKHt ko aa jati nind

us ki pazeb ki jhankar ne sone na diya

mere marqad pe kaha kis ne qayamat hai qarib

yaad aa kar teri raftar ne sone na diya

rat-jage hote rahe hain ki baDhe gham ki umr

ek shab dard-e-dil-e-zar ne sone na diya

main ne sone na diya sham se us ko shab-e-wasl

subh tak zid se mujhe yar ne sone na diya

nish-e-gham ne rag-e-mizhgan se nikala ye lahu

mujh ko raaton mere gham-KHwar ne sone na diya

mai-kasho surKH hain aankhen jo tumhaari shayad

shab tumhein saqi-e-sarshaar ne sone na diya

KHauf tha us ko 'shahidi' teri bad-masti ka

shab jo ham-bazmon ko ayyar ne sone na diya